Dyénésis.
2.
Ani gine i kfagu Dwata di kgimoan i langit, i klamang banwe na i dad kdee i fkahan di mgimoan ani. 
Na di kakel i gfitun duh, tatlag Dwata mimò, du tafnge i kdee mgimoan. 
Taman nun kafye gmanan gablà di gfitun duh, manan, “Nimògu duh ani too mabtas.” Gmanan ani, du i duh ani tatlag di kdee nimoan. 
Én sa i santulen gablà di kgimò Dwata i langit na i banwe. Di kimò Dwata i Amu, i langit na banwe, 
landè fa fule tmabò di tanà, du là fa fulen Dwata i Amu, na landè fa to mimò di tanà. 
Kabay balù landè ulen, tanun yéél tambul di lam i tanà du fye fafê i klamang tanà. 
Kafnge én, mwè Dwata i Amu tanà, du nimoan to mdà di tanà ani. Kafnge én, nyufan i ilung i to ani, na gasil lamnawa, na tamto. 
Kafnge én, tanun tukay banwe i gunun dad kayu, i nimò Dwata i Amu, gsen di gusut i duh dnagit Idén. Na ditù gufnean i to tanimoan. 
Na falnok Dwata i Amu, dee bung kayu déén. Too fye baweh dad kayu ani na i dad bungela too fye knaan. Na di gutngà i dad fule, tafule Dwata lwe kayu, satu kayu én, mlé nawa landè sen, na i satu, mlé gnadè gablà ku tan i fye na tan i sasè. 
Na nun satu yéél di Idén ani, maloh na myéél i dad fule déén. Mdà di Idén, yéél ani dee syatan, du masatngà di fat, na mbaling fat yéél. 
I tnanin yéél dnagit Fison, na maloh salu di klamang banwe Habila. 
Dini di banwe ani gumite i too glut blawen, na i fye bun litak di kayu, na dad batu mabtas. 
Dagit i galwe yéél dunan Gihon, na maloh di klamang banwe dnagit Kus. 
Na i gatlu yéél, dunan Tigris, maloh salu di gsen di gusut i duh di banwe dnagit Asirya. Na Yufratis i dagit i gfat yéél. 
Na dini di tukay banwe gunun kayu nimò Dwata, dnagit Idén, gufnean i to tamgimoan, du fye mimò kenen di tanà na mifat i dad fule déén. 
Na flalò Dwata i Amu i to ani, manan, “Fakay ge kmaan i bunge kdee dad kayu di gumneam ani, 
bay nang ge kmaan i bunge i kayu mlé gnadé gablà ku tan i fye na tan i sasè. Du ku kmaan ge i bungen, too ge mati.” 
Na lêman talù Dwata i Amu, manan, “Là sa fye ku i to aloan satu mnè. Taman mimò agu i demen salngad kenen, du fye nun tmabeng kenen.” 
Kafnge én, nebe Dwata i Amu di to tamgimoan i kdee dad lmanaf, i kdee dad anuk di bnas, na i kdee dad tamgimoan mdà di tanà, du fimoan kenen dagitla. Na balù tan i dagitan i kat satu dad mto ani, én i dagitan. 
Na i to ani i mimò dagit i kdee bung lmanaf, na dad anuk di bnas. Kabay landè di dale blà kenen du nimò demen. 
Taman fkudang Dwata i Amu, i to ani, na too fye kakudangan laan falus tamwan, na klon kudang nwè Dwata i satu lohokan. Na kafngen sansuléan i ungad di gumwean i lohok to ani. 
Na mdà di lohokan ani, nimò Dwata i Amu satu libun, na neben i libun ani di lagi. 
Na man i lagi, “Kenen tagablà demegu, du i tulanan fdu di deg tulan, na i ungadan fdu di deg ungad, dnagitgu kenen libun, du mgimò mdà di lagi.” 
Na ani i duen i lagi tmagak i maan na yéan, na mbaling satu di yaanan, na i lwe ani mgimò satu. 
Balù flaweh i lagi na libun ani, là ale sa myà.