Salmo.
6.
Ani satu lingag Dabid. E Amugu Dwata, nangam agu nngak fagu di sasè kalbutam; nangam agu fanlayam di slà too minit i kaflabeam. 
Kabay, Amugu Dwata, kandom agu du too agu mlungay; tangalam agu, du landè galgu. 
Too msamuk i nawagu. E Amugu Dwata, kilen dé i ktabengam deg? 
Lê ge fdadong di deg, Amugu Dwata, na falwaam agu di fati, du i kakdom landè kgilin. 
Du ku tamati i to landè kiboan faldam ge, na landè to dmayen ge déén di lam i lbang. 
Too agu mlungay nan di kablat klidù i nawagu; klit butang tì agu msabew i lwakgu, na too fafê i gumilègu mdà di kngelgu. 
Tafan agu là mite di kngelgu gambet i to too tua, du too sè klidù i nawagu mdà di kdee mnang nawa deg. 
Fawag gamu di deg, gamu dad to mimò sasè, du fanlinge Amugu Dwata i sdanangu na tnabengan agu. 
Fanlingen i kafnigu tabeng di kenen, na tnimelan i dasalgu. 
I kdee to dmuen deg myà kadang, na làla gadè i nawala. Là mlo ani, nkel ale i kfisan, na mila ale di kyàla.