Salmo.
40.
Ani satu lingag Dabid. Tafantahàgu i nawagu fatan i tabeng Amugu Dwata, na tafanlingen i katlogu kenen. 
I kaflayam gnagugu gambet ditù agu di lam i bong mngalam sol too gamlikò deg i nun fitak too lbu; bay fatunan agu, na fansen agu ftadag di tah i batu i gulandè gamsasè deg. 
Na tdoan agu mlingag i falami lingag, satu lingag dmayen Dwataito. Nun klikò dee to di kitela i ktabengan deg kadang, na én gumdàla smalig di Amuito Dwata. 
Too nun klehew i to smalig di Amuito Dwata; too nun kafyen ku laan magin di dad to fdatah, na laan magin di dad to gasyat du mdà di ksaligla di dad ise glut dwata. 
E Amugu Dwata, ge i Dwatagu, na too dee i tnikeng mgimoam di gami, na landè gasngad ge. I dad fye fandamam gablà di gami là gse; kayègu tulen kdee, bay làgu gagan dun du too dee. 
Ise ku én i toom knayè i dad lmanaf dsù, na i dademe dsù i blé di ge; là ge mni i lmanaf snakuf di lifoh du dsù di ge ku demen i dademe dsù du fye bayad i dad salà; bay én toom knayè i fye kaflingegu na kimengu ge. 
Na taman mangu di ge, “Tadini agu du mimò i knayeam, i tagsulat di libru gugsulat i flaloam. 
E Dwatagu, too agu lehew mimen i knayeam; tafkahgu i flaloam di lam nawagu.” 
Tagtulengu di dad to di bong kastifunla i fye tulen gablà di kagalwà; gadeam là agu sa tlag tmulen dun, Amugu Dwata. 
Làgu buni i fye tulen gablà di kafalwaam deg; gal agu tmulen na ge i too gsalig na too tmabeng. Làgu buni i kakdom landè kgilin na i kagsaligam, du là agu tì fanak ktulengu di bong kastifun i dad tom. 
E Amugu Dwata, nangam beg tanlag i kakdom deg; fye moon ku i kakdom landè kgilin na i kagsaligam fadlug smafang deg mdà di kdee sasè. 
Kandom agu du maglibut agu i too dee gamsamuk nawagu làgu gagan nse; na mdà di too dee i dad salàgu tafan agu là mite, dee ale fa di dad balu i wakgu, na tafangu là gagan mebe i klidùgu. 
E Amugu Dwata, falwaam agu di dee gamsamuk deg ani! Gasilam agu tnabeng! 
Fye moon ku i dad to mayè mati deg là gmadè i nawala, na là gadlug i knayèla nimò di deg. Na fye ku fafanakam i dad to lehew di kafsasèla deg, na fyaam ale mdà di nimòla. 
Fye moon ku bong klidù nawa i dad to madoy deg di kagfisanla agu. 
Kabay i dad to mayè fdadong di ge, fye ku flehew ale di kafyem, na i kdee to lehew mdà di kafalwaam dale, na fye ku là tlag i kdayenla ge na galla man, “Too mdatah Amuito Dwata!” 
Kabay deg, landè galgu na landè gumwègu di klandègu, bay i Amugu Dwata, là mlifet deg. Dwatagu, ge alò i tmabeng deg na falwà deg mdà di sasè kagkahgu; begam agu gasil tnabeng.