Salmo.
132.
Ani satu lingag dad to salu di Bong Gumnè i Amuito Dwata Amumi Dwata, nangam nlifet Dabid, na i kdee kaflayam tnayudan. 
Fandamam i fakangan di ge, ge i Too Mtulus Dwata gusmalig i gutambulmi Dyékob, 
du makang kenen, manan, “Là agu mulê di gumnègu, demen milè; 
na là agu kudang; balù fidang matagu, là, 
kel di kitegu tanun gumnè Amugu Dwata, i gumnè i Too Mtulus Dwata gusmalig i gutambulmi Dyékob.” Én fakang Dabid. 
Kantomi ditù di Bétléhém lingemi gablà di gufkahla kaban gumkah i dad batu gugsulat i dad flalò Dwata, na ditù gumitemi dun di lagad Dyar. 
Taman manmi, “Salu ito ditù di gumnè i Amuito Dwata, na mangamfù ito di muna i gusudeng i hariito Dwata.” 
E Amumi Dwata, salu ge di gumneam, na fanak ge déén, ge na i kaban gumkah i dad flaloam, én gumite i bong enegam. 
Fnimi ku i dad bàmi di ge mebe i katlum, na mkit i kdee tom di klehewla. 
Amugu Dwata, du tamakang ge di saligam Dabid, taman nangam knagol i harì tamgalékam ani. 
Tatoo ge makang di ku Dabid, na laam nawì i fakangam, i tagmanam, “Nimògu harì satu di dad ngaam, na kenen i harì tmadol di ge. 
Ku nafè i dad ngaam lagi i tafakanggu di gamu na nimenla i kdee tdògu dale, nun di bella lagi kadang mbaling harì tmadol di ge kel di landè sen.” Én i fakangam di ku Dabid. 
Mgalék Amuito Dwata i banwe Sion, du kayean mnè ditù, 
na manan, “Ani i gumanakgu kel di landè sen, du kayègu ku dini gumnègu. 
Blégu di dad to di Sion i kdee kanlidùla; balù i dad to landè knun, fabsolgu ale knaan. 
I dad bàyu di deg mebe i kagalwà di salà mdà di deg, na mkit i kdee togu di klehewla. 
Nimògu harì di Sion satu bel Dabid, na tangalgu na flawilgu kagot i harì mgalékgu. 
Toogu fyà i dad to dmuen kenen, bay too nun kafye i kenen kagot, gambet too mneng i kyangenan.”