Dad Fngewe.
7.
Tingàgu, flinge ge i tdògu ge, na nangam nlifet i kafngewegu ge. 
Toom fkah di nawam fngewegu ge du fye mlawil ge, na toom fangeye i klaloam i dad tdògu ge, salngad i kafgeyem i dadmatam. 
Toom fkah di fandamam, na di nawam i dad tdògu ge, du fye laam glifet dun. 
Knabasam i kfulung, salngad i kakabasam i flanekam, na knabasam i kaglabat, salngad i kakabasam i demem sgalak, 
du én kamlung ge di boyo i libun mlafà i yaanan, na gafadnan ge di kladal taluan. 
Satu duh meye agu di bintanà i gumnègu. 
Na teengu dee sawang lagi na kulang kfulungla, bay teengu satu di dale i landè kaglabatan. 
Magu kenen di dalan mdadong di gumnè i satu libun, na là mlo mdadong kenen di gumnean. 
Na i kagkah i duh, fan sdaf, na tafan kifu. 
Na snitong i libun i lagi ani, na kamlaweh kenen i klaweh i libun mkat lagi, na tafandaman kiboan moyo kenen. 
Labè kenen na landè kyaan, na dee gal gusalun, na laan gal mnè di gumnean. 
Slaan déén kenen di kilil i dalan, slaan déén di fadyan di gunundad to, fatanan du neyen ku simto bnoyon. 
Na di kiten i lagi ani, lkafan, na nalakan, na too meye di kenen na manan, 
“Duh ani tadnohògu i fakanggu, na nun utengu mdà di kadsùgu. 
Taman fanngabalta ge, na du teenta ge taman smitong agu. 
Na nlafingu i gumilègu i too fye baweh batak safut fdu di banwe Idyif. 
Na tankokgu fangbun i gumilègu i dnagit mira, alo, na sinamon. 
Taman magin ge deg du nimòta i knayèta i gaflehew gite kel mwal. 
Là déén yaangu di gumnè, du mawag gusalun. 
Neben sa bong filakan, taman laan mlal samfulê, lwe linggu fa.” Ani gman i libun mlafà i yaanan. 
Na tagboyon lagi ani fagu di kladal i dad gmanan. 
Taman fanlalan lalò i libun ani, salngad i baka dyol salu di gumatin, salngad i uhe mfawel di fawel, 
na nun tbak di fufungan, salngad i anuk di bnas mayeng ditù di fawel, laan gadè i gukelan kadang di fati. 
Dad ngàgu, flinge gamu i tdògu gamu, na mimen gamu i mangu ani. 
Nangyu faloh i nawayu magin di ayè i libun gambet ani, na nang gamu mlalò i kenen dalan. 
Du tadee lagi falmon, na i dad lagi tamati du mdà di kenen, làyu gse dun du toodee. 
Na ku salu gamu di gumnean, én sa gusaluyu di banwe i dadmati, na i dalanyu ani salu di fati.