Dad Fngewe.
8.
Flinge gamu, du i kfulung na i kaglabat flingengu di satu to tamlo, na falbongan i katlon. 
Tamlo kfulung di bilil, na di gusite i dad dalan di gunun dee dad to, 
na di gufusuk i banwe, falbongan taluan, manan, 
“Toogu fni di gamu dad to, fanlingeyu agu. Tamlo agu di kdee dad to di klamang banwe, du fye flinge gamu deg. 
Gamu kulang i kfulung faldam, flinge gamu du fye fulung gamufaldam, du fye là gamu gasyat, na gamu là fulung faldam, flinge gamu du fye gamlabat gamu. 
Fanlingeyu i kafye mangu, du kdee mangu di gamu too tlu, 
du i mangu slame glut, na knanggu i kakakéng. 
I kdee mangu slame matlu, là agu tmulen kéng, na landè bigkò di mangu. 
Na di to too nun kaglabatan, gadean too glut i mangu, na di to nun gnadean, gadean too matlu i mangu. 
Én nalékyu i dad tdògu ise ku salafì, nalékyu gnadè ise ku i too fye blawen, 
du agu i kfulung na mabtas fa di kabtas i dad too fye kas, na balù tan i knayèyu di tah tanà ani, landè fsalngadyu di deg, dutoo agu mdatah. 
Agu kfulung nun kaglabatgu, nun gnadègu, na fulung agu mebe i ktogu. 
I to nun klikoan di Dwata, knangan i sasè. Na agu kfulung, mnang agu i kafdatah, i kafdag, i sasè nimò, na i kakakéng. 
Agu kfulung, fulung agu mngewe, na fulung agu tmabeng, nun kaglabatgu na nun glalgu. 
Mdà di deg i dad harì gmagan mebe i dad tola, na i dademe dad ulu fulung ale mimò i dad matlu urdin. 
Landè ulu di tah tanà ani fulung mebe i dad to di fye, ku ise agu tmabeng dale. 
Kandogu i dad kamdo deg, na dad to mngabal deg, teenla agu. 
Banlégu ale knun mlawil, afè, na kafye knè. 
I gwèyu mdà di deg, mabtas fa di kabtas i too blawen, na di kabtas i too salafì. 
Magu agu di dalan matlu, na lalògu i matlu nimò. 
Na i dad kamdo deg, banlégu ale knun, na tananùgu i mabtas knun i gumnèla. 
Agu kfulung, muna mgimò Dwata, di laan fa mgimò i kdee di tah tanà ani. 
Tagnè agu mdà fa di kagatbuan, di là fa mgimò i banwe ani. 
Tagnè agu di landè fa mahin, na dad sfuten i fnò yéél. 
Di là fa mgimò dad bulul, tagnè agu. 
Na di là fa mgimò Dwata i klamang banwe, na balù i kfung, tagnè agu déén. 
Déén agu di kafkah Dwata i langit ditù di tah, di kimoan i bleng i langit na mahin, 
di kafkah Dwata i dad labun di langit, di dad sfuten di lam i mahin, 
di kafkahan ilè di gusen i mahin, du fye là sambél di kafkahan dun, na di kimoan kgal i klamang banwe ani, déén agu. 
Déén agu di safédan, na magin agu kenen mimò. Na kat i duh flehew agu kenen, na lehew agu magin di kenen, 
na lehew agu i banwen, na i dad to tamgimoan. 
Taman dad ngàgu, fanlingeyu agu, nun klehewyu ku nimòyu i gmangu di gamu. 
Ku fanlingeyu i tdògu gamu, nun kfulungyu, na tooyu fkah di nawayu i gmangu ani. 
Nun kafye di to flinge deg, i to kat i duh mnè déén di bà i takabgu, i to fatan deg. 
Du i to mite deg too mlawil, na kanlehew kenen Dwata. 
I to là mite deg fanlayaman i kton, na i to mnang deg, bong nawan i fati.” Kdee ani gine gman kfulung.