Dad Fngewe.
10.
Na ani dademe dad mabtas fngewe Solomon dunan: Gamlehew i mà i tingaan lagi ku fulung faldam, bay gamlé i klidù di yéan i tingaan lagi là fulung faldam. 
Landè gufyem di knun gweam fagu di klimbung, bay i katlu nimò i gafalwà ge di fati. 
Là faloh Dwata ku malnus i dad to matlu, na laan faloh ku gwè i dad to sasè i sasè kniballa. 
Ku là ge mayè mimò, én gaflandè ge, bay ku malgad ge mimò, én gafnun ge. 
I to fulung faldam, kamtu kenen di bang i kaktu, bay magagyà i to ku én balingan nimò kudang di bang i kaktu. 
I to matlu, nun kafye gdawatan, na i to sasè, gbunin i klabean fagu di kfulungan talù. 
I to matlu, fnadlug gafaldam kenen balù tamlo nan mati, bay i to sasè, too malmo i dengegan na too kenen mlal glifet. 
I to fulung faldam, too gamdawat i fye fngewe, bay i to talù là man, falmon i kton. 
I to matlu landè klikoan du mdà di fye nimoan, bay i to mlimbung, gakfè di klimbungan. 
I to muni i kaglut, én gumdà i ksamuk, bay i to labè mngak i to mimò sasè, kenen gafatlag i ksamuk. 
I to matlu, galan man i gafye, na gatgal i dad to mlinge imanan, bay i to sasè, gbunin i klabean fagu di kfulungan talù. 
I gukel i kasnang nawa, dunan samuk, bay gukel i kakdo, dunan klifet i kdee salà. 
Fagu di talù i to nun kaglabat, dnileam i kfulungan, bay i to landè kaglabatan, fye ku fanlayam kenen. 
I dad to fulung faldam, làla fagfan i gnadèla du funala gal toofandam ku tan i manla, silang talù. bay ku talù i to là fulung faldam, too mlal i ksamuk. 
I kamlung i to nun knun, dunan i knunan, bay i gafalmo i to landè, dunan i klandean. 
Mdà di untung i to matlu, nun klawilan, bay mdà di untung i to sasè, nun kaflayaman. 
I to flinge ku nun mngak kenen, én i to mlawil, bay i to là dmawat i kagsalaan, nun sasè gdawatan. 
I to muni i knang nawan, én i to tmulen kakakéng, na i to samtugad salék, én i to là fulung faldam. 
I to too mayè stulen, slaan gsalà du mdà di dee manan, bay i to gadnanan i taluan, kenen i to fulung faldam. 
I dad talù i to matlu too mabtas, salngad i btas i glut salafì, bay i fandam i to sasè landè btasan. 
I dad talù i to matlu, too gamtabeng i dee dad to, bay i to là fulung faldam, là mlawil du landè kaglabatan. 
Én gafnun i to mdà alò di kafye blé Dwata, na i kafye blén là gfun dun fagu di kalgad mimò. 
I to là fulung faldam, too flehew di kimoan sasè, bay i to nun kaglabat, too flehew di kimoan fye fagu di kfulunganfaldam. 
I kanlikò i to sasè, baling sa mkel di kenen, bay i to matlu, én sa mkel di kenen i knayean. 
Kakel i bong ulen na too mgal i nus fugen i to sasè, bay i to matlu kel di atuan là fisan di kgal i nus. 
Nangam fimò i to malwe mimò du baling smamuk ge, na sasèkafalyalom, salngad kafalyalom i kifanam ku mgihok i sukà ku demen kafdê matami buk. 
I to nun klikoan di Dwata, mlawil kenen, bay i to sasè, mlal mati. 
I fatan i to matlu, én gamlé kenen klehew, bay i fatan i to sasè, là gdawatan dun. 
Kanlung Dwata i to matlu, bay i to mimò sasè, falmon. 
I to matlu, nun kenen kafye mdà di Dwata landè gutlagan, bay i to sasè, là mlawilan di tah tanà ani. 
I gman i to matlu gugmadè i kfulungan, bay i gman i to sasè, matlag sa kadang. 
Gadè i to matlu i dad fye man i là fatduk i demen to, bay i to sasè, galan fatduk i demen to fagu di sasè gmanan.