Dad Fngewe.
27.
Nang ge fdag gablà di nimoam fayah, du laam gadè ku tan fa kel di ge. 
Fye ku nun dademe dad to dmayen ge, nang ku ge dmayen i ktom. 
I batu na falak too blat bay blat fa i ksamuk i nimò i to là fulung faldam. 
I kaflabè gafatduk nawa i to na gafalmo, bay i kingà nawa too fa sasè gafalmo. 
Fye fa ku nngakam i satu to, du ku laam nngak ken man nawan landè kakabasam kenen. 
Fye fa i katduk nawam fagu di demem sgalak, du fakay smaligkenen, di kafafye i to dmuen ge du ken fangawan ge. 
I to bsol, balù tnab laan mayè, bay i to bitil balù féét i neman mbaling mi. 
I anuk di bnas tatì alò mayeng na là samfulê di fulalan, salngad i to ku tatì alò lamngab na là mnè di gumnean. 
Ku ungafam i fangbun, too ge lehew, na ku nun samuk, lana i ktanak nawam. 
Nang tatì fbayà i demem sgalak na i deme i maam sgalak, na ku nun smamuk ge, nangam ftabeng i flanekam mawag dige, fye fa ku ftabengam i demem saldan mdadong di ge di flanekammawag di ge. 
Tingàgu, fye ku mbaling ge to fulung faldam, du fye lehew inawagu, du ku ani nimoam na gadègu tmimel i dad to madoy deg. 
I to fulung mebe i kton tagadean i samuk fan kel, taman funanniwas, bay i to kulang i kfulungan faldam laan niwas i samuk, tatì fadlugkel di kagdawatan i flayam bunge i nimoan. 
Ku nun to makang kenen mayad uteng i to laan gadè, fye ku nleges kenen smandà i knunan kel di kagbayadan i utengan. 
Ku nukatam i demem sgalak too flafus na too makto i taluam dikenen balù fye i manam, man nawan fanlagim kenen. 
Là too fye fanlinge uni i yéél tatì fadlug tamdak, salngad ksasè fanlinge i libun ku tatì fadlug too mugak i yaanan. 
Na là fakay fatlag i kugakan, salngad i nus là fakay fatlag, demen là fakay magot i fngalo di falelam. 
I tek fakay néhê di tek, salngad i dad to du fakay ale séhê fandam. 
I to mifat i kayu nun bunge, gamkaan sa i bungen, na salngad i satu salig mifat i amun, du gamdawat sa bunge inimoan. 
I alung i satu to fakay teen di yéél, na fakay teen ku tan mnè di nawa i satu to fagu di galan nimò. 
Là bsol i fati na gumnè i dad mati, du gal fatan i dademe, salngad i to là bsol, du dee fa knibalan. 
Tnilew i salafì na blawen fagu di lifoh, du neye ku too glut, na tnilew i kafye ldam i satu to fagu di kdayen kenen, du neye kutoo glut fye i ldaman. 
Balù fa fakay ndak di sung i to là fulung faldam, knean là magwè di kenen i klandè kfulungan. 
Toom nifat i dad lmanafam, 
du nun gusen i knun, na balù i to nun glal nun gusen i glalan. 
Ani i nimoam, nligom i bnas na santifunam du fkaanam i dadlmanafam klom fatan di lê ktabò i bnas. 
Na i bul dad lmanaf gambet bilibili, fakayam nimò klaweham, na i dad kambing fakay fabli na i gweam fakay bayadam tanà. 
Na i dademe dad kambingam gamlé gatas di ge na dad malayam, na balù dad saligam libun.