Dad Fngewe.
29.
Ku tadee dulê nngak i satu to, bay knean mgal fa i ulun, én sa gamgebe kenen di kalmo i landè gugalwaan. 
Ku matlu i to mebe i banwe, too lehew i dad to, bay ku sasè i to mebe i banwe, landè klehew i dad to mnè dééndu too ale maflayam. 
I to kmabas i kfulung, flehewan i maan, bay i to samnagin i libun mkat lagi, falmon i filakan. 
Ku too fkah i harì di nawan i matlu kukum, too nun ktanak dibanwen, bay ku alò én fandaman i filak, toon falmo i banwen. 
Ku simto dmayen i demen sgalak, bay kadì ise mdà di nawan, tatian falmo i kton. 
I to sasè, én kamfè kenen i salaan, bay i to matlu fakay mlingag na flehew. 
I dad to matlu too gmadè kamdo na tmabeng i dad to landè digususay, bay i dad to sasè là mabtas di dale i dad to landè. 
I dad to gal madoy fakay ale finit nawa i dad to di satu syudad, bay i dad to fulung faldam fakay fatlag klabè i dad to. 
Landè kibò musay i to fulung faldam na i to là fulung faldam, du ku ditù di gususay i to là fulung faldam là manak, alò kenenmadoy na flabè. 
I dad to gal manò, knangla i matlu to, bay i dad to fye, toola nifat i to matlu. 
I to là fulung faldam, toon falwà i kaflabean, bay i to fulung faldam, gadnanan i kton. 
Ku i satu ulu flinge i dad kakakéng na fnaglutan, mbaling sasè i kdee dad to tmabeng kenen. 
I to landè na i to mkut i to landè, nun gusalngadla, du nun blé Dwata dale mata du fye mite ale. 
Ku glut kukum i harì i dad to landè, too mlawil i kagotan. 
Nun gufye i dad ngà ku tdò na fanlayam ale di gugsalàla, bay i dad ngà tatì fbayà di gugsalàla fyàla kadang i yêla. 
Ku sasè i dad ulu, too matnù i sasè, bay i kalmola teen i dad to matlu. 
Fanlayamam i tingaam di gugsalaan, na nun kadang ktanak i nawam, na flehewan i nawam. 
I dad to là flinge Tnalù Dwata sasè, du tatìla nimò i knayèla dulandè malak dale, bay i dad to mimen i tdò Dwata nun kafyela. 
Dademe salig là fakay ku tdoam ale fagu di taluam, du balù glabatla i manam dale, là ale flinge. 
Fye fa i to là fulung faldam, di to i là funa faldam klon fa talù. 
Ku mdà di ktukay i saligam na faknalamam mlé i kdee knayean, là mlo i kdee nfunam nwean na mlé ge klidù nawam. 
I to labè gal smamuk, na i to mlal malbut gal gamsalà. 
I to fdatah i kton mdanà sa kadang di satu duh, bay i to fdanà i kton, mdatah sa kadang di satu duh. 
I to samnagin i to gal tmaku toon fanlayam i kton, du ditù di gumusay, na ku tulenan i kaglut fanlayam kenen, na ku laan tulen i kaglut fanlayam kenen Dwata. 
Sasè ku fsamukam i nawam gablà di fandam i dad to gablà di ge duén gambet i fawel mawel ge, bay ku baling ge smalig di Dwata, kanlungan ge. 
Dee dad to mayè ku i ulula mimò fye di dale, bay i matlu nimò alò mdà sa di Dwata. 
I to matlu knangan i to sasè, na i to sasè knangan i to matlu.