Dad Fngewe.
30.
Ani i dad fngewe Agur, i tingà Dyakeh fdu di banwe Masa, na talù kenen di ku Itil na Ukal, manan, 
“Deg sa i to landè gnadè, na landè kaglabat, là gambet dademe to. 
Làgu lmen gambet du fye fulung, demen landè gnadègu gablà di Dwata, i Landè Salà. 
Nun kè to lmen magket salu di langit di gumnè Dwata, na samfulêdini fdu ditù? Nun kè to lmen samtifun i nus na nagotan di falelan? Nun kè to lmen mungas i klamang yéél na i klamang mahin di saulan? Nun kè to lmen mimò i klamang banwe na i dad gusablengla? Simto lmen mimò kdee ani, tan i dagitan na dagit i tingaan? Tulenam deg ku gadeam. 
Kdee tnalù Dwata too glut, landè là glut, na kanlungan i kdee fikit di kenen. 
Nang ge tamnù di tnaluan, du ku én nimoam nngakan ge na fgadean, ge to tmulenkéng.” Ani gman Agur. 
Fakdogu di ge Dwata, di là agu fa mati, dnohoam di deg moon lwe ani. 
Satu, tnabengam agu du fye là agu tmulen kakakéng, na i galwen, nangam blé di deg bong knun, na ku demen faloham di deg i klandè, tiam blé deg i gablà knaan di klit i duh, 
du ku bong lukas i blém deg, ken mangu landè gukmamugu ge, demen ku landè agu, ken tmaku agu na gafalmogu dengeg Dwatagu. 
Nangam tulen di satu amu i kdalamam i satu saligan, du ku ani nimoam, fanlagin ge, na ge baling maflayam. 
Nun dad to mlagi i màla, na là mlé kafye di yêla. 
Nun dad to flingu too ale mlaneb bay i kaglutan, di lam i nawala too ale magagsik. 
Nun dad to fandamla too ale mdatah, na taman toola fdatah i ktola. 
Nun dad to too ale mkut i dad to landè, na kdee sasè nimò nimòla di dad to landè, du fye gwèla i knunla. 
Nun satu to too lom, na nun lwe ngaan libun, na galla man, “Banlém gami,” bay balù tan i blém, là gabsol dale, taman salngad ale di fat ani, 
dunan banwe i dad mati, i libun là fakay mngà, i tanà là alì nulen, na lifoh fadlug smakuf na là fakay fnati. 
I to madoy i maan, na too là mayè mimen i yéan, fye ku tnukè i dad anuk di bnas i dad matan, na i lawehan knaan i dad kablak. 
Nun tlu tnikenggu, nun fat i làgu glabat, 
kibò i kablak mayeng di langit, kibò i ulad fulu di tah i batu, kibò i kafal magu di talà mahin, na kibò i lagi kamdo i libun. 
Ani nimò i libun mlafà yaanan, di fandaman landè sasè nimoan, taman, manan, “Landè sa sasènimògu.” 
Nun tlu too sasè di fandam i dad to di tanà ani, nun fat i knangla, 
i salig mbaling harì, i to là fulung faldam, i tanun kdee knayean knaan, 
i libun sasè ldam na landè kamdo kenen, bay gamwè yaan, na i libun alò salig mbaling amu di gumnè i amun. 
Nun fat too malnak dini di tah tanà, bay knean too ale fulung, 
i dad mamang balù too ale mlungay, knean santifunla i knaanla di bang nun gumwèla, du fatlagadlaknaanla di bang i klandèla, 
i satu bung lmanaf dnagit kuni, too ale mlungay, knean gmagan ale mimò i gumnèla di gunun batu, 
i dad tlangas, balù landè malak dale, knean stadol ale mayeng, 
na i dad tikì balù fakay kanfè i kmalam, knean mnè ale di gumnè i dad harì. 
Nun tlu fye neye i kagula, du fulung ale magu, nun fat kadì, 
kagu i liyun labè di kdee lmanaf, na landè klikoan, 
kagu i masel smagégél i tinefen, kagu i lagi kambing fdadong di libun kambing, na kagu i harì di muna i dad sundalun. 
Ku lmenam fdatah, du là ge fulung faldam, demen tafandamam i kiboam mimò sasè, tanlagam ani na fandamam i gukel i dad nimò gambet ani. 
Ku mlo kanligongam gatas msut i tabè, na i ilung, ku snuntukam mlitè, salngad i klabè, ku ninitam mbaling nun samuk.