1 Lada.
15.
Kɛ́ Davidi kpɛdↄ̀dↄ azĩaɛ a wɛ̃́lɛ guu, ↄ̃ à gukɛ̀kɛ Lua kpagoloɛ, à zwã̀akpɛ dↄ̀ɛ̀ 
à mɛ̀: Gbɛ̃e Lua kpagolo sɛa zɛ́ vĩo, sema Levii buiↄ bàasio, asa Dii mɛ́ ń dílɛ a sɛnaↄ ũ, aaiↄ a zĩ kɛ gↄↄpii. 
À Isaili bui píi kã̀aa Yelusalɛũ, kɛ́ aa gɛ Dii kpagolopi sɛ suò gu pↄ́ a kɛ̀kɛɛ̀u. 
Ɔ̃ à Aalona buiↄ ń Levii buiↄ sìsi: 
Kɛata buiↄ dↄaana Uliɛli ń a gbɛ̃́ gbɛ̃ↄn basooloↄ. 
Mɛlali buiↄ dↄaana Asaia ń a gbɛ̃́ gbɛ̃ↄn ↄ̀aa do ń baooↄ. 
Geesↄ̃ buiↄ dↄaana Yoɛli ń a gbɛ̃́ gbɛ̃ↄn basoolokwiↄ. 
Ɛlizafã buiↄ dↄaana Semaia ń a gbɛ̃́ gbɛ̃ↄn ↄ̀aa doↄ. 
Hɛblↄ̃ buiↄ dↄaana Ɛliɛli ń a gbɛ̃́ gbɛ̃ↄn basiiↄ̃ↄ. 
Uziɛli buiↄ dↄaana Aminadabu ń a gbɛ̃́ gbɛ̃ↄn basↄokwi ń plaoↄ. 
Ɔ̃ Davidi sa'onkiaↄ Zadoki ń Abiataao sìsi ń Levii buiↄ Uliɛli, Asaia, Yoɛli, Semaia, Ɛliɛli ń Aminadabuo. 
A ònɛ́: Levii bui dↄaanaↄn á ũ. Ápiↄ ń á gbɛ̃́ↄ à gbãbↄ ázĩaɛ, í gɛ́ Dii Isailiↄ Lua kpagolo sɛ́ à suò gu pↄ́ má kɛ̀kɛɛ̀u. 
Dii wá Lua pↄ fɛ̃̀wázi káau, kɛ́ á Levii buiↄ ámɛ á sɛao yã́i. Wi yãgbɛawà a zɛ́wao. 
Ɔ̃ Sa'onaↄ ń Levii bui kĩniↄ gbãbↄ̀ ńzĩaɛ, kɛ́ aa Dii Isailiↄ Lua kpagolo sɛ suò yã́i. 
Ɔ̃ Levii buipiↄ gɛ̀ Lua kpagolo sɛ dà ń gã̀u, aalɛ suò ń a sɛ́liↄ lá Dii ò Mↄiziɛwa. 
Ɔ̃ Davidi ò Levii bui dↄaanaↄnɛ aa ń gbɛ̃eↄ dilɛ aaↄ lɛsi ń pↄ́'ↄbↄnaↄ: Domaↄ ń mↄↄnaↄ ń sɛ̃́sɛ̃naↄ, an pↄna súu iↄ dↄ. 
Ɔ̃ Levii buipiↄ Yoɛli nɛ́ Emani dìlɛ ń Bɛlɛkia nɛ́ Asafao ń Mɛlali bui Kusaia nɛ́ Etanio. 
An kwàasiↄn kɛ: Zakali, Yaaziɛ, Semilamↄ, Yeiɛli, Uni, Ɛliabu, Benaia, Maasea, Matitia, Ɛlifeleu, Mikinɛia, Ɔbɛdɛdↄũ, Yeiɛli ń Azaziao. 
Lɛ̀sin dↄaanaↄ Emani, Asafa ń Etanio lɛ́ mↄgotɛ̃ sɛ̃́sɛ̃naↄ lɛ́. 
Zakali, Aziɛli, Semilamↄ, Yeiɛli, Uni, Ɛliabu, Maasea ń Benaiao lɛ́ doma'ↄ gèele lɛ́. 
Matitia, Ɛlifeleu, Mikinɛia, Ɔbɛdɛdↄũ, Yeiɛli ń Azaziao lɛ́ mↄↄna'ↄ kelena lɛ́. 
Levii bui dↄaana Kenania mɛ́ kpagolosɛnaↄ dↄaana ũ. Ì yãdanɛ́, kɛ́ a dↄ̃a vĩ a guu yã́i. 
Bɛlɛkia ń Ɛlikanao mɛ́ kpagolopi dↄ̃̀anaↄ ũ. 
Sa'onaɛ beeↄ mɛ́ lɛ́ kã̀aepɛ Lua kpagolo aɛ: Sebania, Yosafa, Nɛtanɛli, Amasai, Zakali, Benaia ń Ɛliɛzɛɛo. Ɔbɛdɛdↄũ ń Yehiao dɛ a dↄ̃̀anaↄ ũɛ lↄ. 
Màa Davidi ń Isailiↄ gbɛ̃zↄ̃ↄↄ ń zĩgↄ̃ gbɛ̃ↄn ↄ̀aasↄsↄoↄ dↄaanaↄ gɛ̀ Dii bàakuańnↄ kpagolo sɛ̀ Ɔbɛdɛdↄũ bɛ, aalɛ suò ń pↄnao. 
Lua dↄ̀ Levii bui pↄ́ kpagolopi sɛaↄlɛ, ↄ̃ wà sa'ò ń zuswanaↄ mɛ̀n sopla ń sãsakaoↄ mɛ̀n sopla lↄ. 
Davidi bàabaa gomusu daa ń Levii bui pↄ́ kpagolo sɛaↄ ń ń dↄaana Kenaniao ń lɛ̀sinaↄ píi. Davidi bàabaa sa'o'ula daa lↄ. 
Màa Isaili bui píi lɛ́ su ń Dii kpagoloo ń kúkuakɛao ń kuu'ↄo ń kã̀ae'ↄo ń sɛ̃́sɛ̃n ↄ́o ń domalɛao ń mↄↄnlɛao. 
Kɛ́ Dii kpagolo lɛ́ gɛ̃ Davidi wɛ̃́lɛu, Saulu nɛ́ Mikali lɛ́ zĩ́lɛ gwa fɛnɛntiu. Kɛ́ a è kí Davidi lɛ́ ↄ̃wã, àlɛ pↄnakɛ Dii aɛ, ↄ̃ à sakàaàgu a sↄ̃ guu.