Yobu.
23.
Ɔ̃ Yobu mɛ̀: 
Baa e tia málɛ yã́kũtɛ̃ka wɛ̃nannↄ, Lua ↄtↄ̃̀a gbã́ugbãu, málɛ aaukɛ. 
Tó má dↄ̃ gu pↄ́ má aà eu, dↄ̃ ma gɛ aà kĩ́i. 
Má a yã́ↄ dↄdↄɛ̀, má lɛkpaakɛaànↄ, 
mí ma lá a wea, míↄ yã́ pↄ́ a omɛɛ tàasi kũa. 
A sòlekɛmanↄ a gbãa pua lɛ́u nɛe? Aawo! A íbɛlɛsɛmanↄo. 
Wekĩi gbɛ̃maa a e yã'ouɛ̀, ma yã́kpalɛkɛnapi i ma kɛ̃ e gↄↄpii. 
Tó ma gɛ gukpɛ oi, a ku weo, tó bɛ'aɛɛ sↄ̃, mili aà e weo. 
Tó àlɛ zĩkɛ gugbãntoo oi, mili wɛsiaàlɛo, tó à lìlɛ gɛↄmidↄkĩi oi, mili aà wɛ́pao. 
Ãma a zɛ́ pↄ́ má sɛ̀ dↄ̃, tó à ma yↄ̃, má bↄ lán vuawaɛ. 
Ma aà kɛ̀sɛ kũ̀, ma aà zɛ́ sɛ̀, mi lilɛo. 
Mi bↄ aà yãdilɛaↄ kpɛo, yã́ pↄ́ bↄ̀ aà lɛ́u kɛ̀mɛɛ na dɛ ma pↄbleaa. 
A ku ado, démɛ a fↄ̃ zɛ giɛ̀i? Yã́ pↄ́ kàaàgu ↄ̃ ì kɛ. 
A zĩkɛ yã́ pↄ́ a dìlɛmɛɛwa, mɛ́ a yã́ↄ kũa a nↄ̀sɛu dasi lↄ. 
Bee yã́i gili ì gɛ̃magu aà aɛ, tó ma làasookɛ̀wà, iwãa ì ka ma pↄaɛ. 
Lua ma kãdɛ̀, Gbãapiide vĩadàdamazi. 
Gusia kù ma wɛ́a, ãma i to ma nilɛo.