Yobu.
26.
Ɔ̃ Yobu mɛ̀: 
N dↄ yɛ̃̀ɛɛsaidelɛn wee? N ↄdà gbãasaidewan wea? 
N lɛdà ↄ̃nↄsaidewan wee? N bↄ ń wɛzɛ̃ zↄ̃ↄon wee? 
N yã́pi ò ń dé gbãao ni? Démɛ dↄ̀aanɛ n yã́ bee òi? 
Gyaadeↄ lɛ́ pelembo ísia ń pↄ́ pↄ́ kú a guuↄ zíɛ. 
Bɛda yãe ulɛa Luaɛo, pↄe daaɛ̀ gɛↄbɛlao. 
Ì gugbãntoo musu kpálɛ bàlumaa, a tò dṹnia gola síiↄ̃ looa pↄewao. 
Ì í ye a bɛ puanau. Ń ípi gbiakɛo luabɛpuanapi lí pũnao. 
Ì pↄ́ku mↄvuala, ì luabɛsiana na azĩai. 
À iadà ísiaɛ gu'ea lɛ́ zɛlɛu, a dɛ kↄↄ ũ gupua ń gusiao zãnguo. 
Tó Lua pũ̀na, gu ì dee, tó à kã̀a, ì bↄ ń saɛ. 
À ísia yà ń a gbãao, à kwãsa wìwi ń a dↄ̃ao. 
A tò gu wèe ń a lɛ́'ĩanao, à mlɛ̃̀ kↄ̃̀nikↄ̃ni bàwãade zↄ̃̀ɛ ń ↄo. 
Aà yãkɛaeↄn we, a yↄↄna wálɛ ma we. Wá fↄ̃ wà aà gↄ̃sakɛyãↄ gbadↄ̃ píio.