Yobu.
35.
Ɛlihu ɛ̀a pɛ̀ a yã́lɛ à mɛ̀: 
Kɛ́ n mɛ̀ Lua a yãnakpama, ↄ̃ n ɛa n mɛ̀ bↄ́ ài kua duunasai vĩi, ge bↄ́ má sɛ́lɛ a guui, ńlɛ e yã́ pↄ́ ń bɛopi maa yã̀? 
Mpi ń n gbɛ̃́ↄ, má yã́zãsiwá. 
Wɛ́sɛ ǹ luabɛ gwa, gwa lá luabɛpuana zã̀nnↄ mɛ̀! 
Tó n duunakɛ̀, bↄ́ a wo Luawai? Tó n tàae lɛ́ diadi, bↄ́ a biwài? 
Tó ń kú n dↄ̀ↄwa, bↄ́ ńlɛ aà gbai? Bↄ́ àlɛ emai? 
N gbɛ̃́deeↄ ↄ̃ n vãikɛa ì pↄ́ womá, n gbɛ̃nazĩn deeↄ ↄ̃ n maakɛa ì àikɛnɛ́. 
Gbãamↄanɛ́ pãsĩ ì to wà wiilɛ wà mɛ wá sí gbɛ̃́ taiinkɛnaↄwa. 
Ãma an gbɛ̃e lí mɛ Lua a Kɛna ku máɛo. Ɔ̃mɛ ì to wàↄ lɛtɛ̃ dↄ gwã́, 
ì yãdawɛ̃ɛ dɛ nↄ̀bↄↄla, ì wá gba ↄ̃nↄ dɛ bãↄla. 
Tó wà wiilɛ̀wà, ìli yãmamáo, kɛ́ gbɛ̃vãipiↄ ìↄ dↄ́ɛwà yã́i. 
Wii pãɛ! Lua lí swã́sɛio, Gbãapiide lí ń yãdao. 
Baa kɛ́ n mɛ̀ ni wɛsiaàlɛo, n yã́ aà kĩ́i lè, sↄ̃́aaàzi. 
Kɛ́ àlɛ pↄkũmabↄbↄmá tia kɛ́wao ↄ̃ ńlɛ e àlɛ tàae pↄ́ wa kɛ̀ↄ yãdaoɛa? 
Beewa Yobu yãpã ò, à yã́ pↄ́ á a gbadↄ̃o bↄ̀lɛ.