Soũↄ.
16.
Davidi lɛ. Ma dↄ̃́a Lua, ḿmɛ ma nanzi. 
Má ò Diiɛ ma diin n ũ, ḿmɛ ń ma aafia ũ. 
N gbɛ̃́ pↄ́ kú ma bùsuuↄ mɛ́ dɛ gawide pↄ́ ì kamaguↄ ũ. 
Gbɛ̃́ pↄ́ aaì wã gɛ́ tã́a kĩ́iↄ aaì yã'ↄ̃ma kpá ńzĩaziɛ. Má sa'o'i tↄ̃́lɛńnↄo, wa ń tã́aↄ tↄ́ ma ma lɛ́uo. 
Dii, n ma ka ma baawa, ma wɛ̃ni ku n ↄzĩɛ. 
N kↄↄ dàmɛɛ gumaau, gba pↄ́ ń dàmɛɛ kàmagu. 
Má Dii táasilɛ kɛ́ ì lɛdaa, baa gwã́ ì to ma sↄ̃ ma gba laai. 
Miↄ Dii e ma wɛ́u gↄↄpii, lá a kumanↄ, má kpaguao. 
Bee yã́i ma pↄ ìↄ na, ma nↄ̀sɛ ìↄ yáalↄ, ma wɛ́ dↄi lↄ ma mɛ aↄ ku aafia. 
Asa ńyↄ̃ ma to miauo, ńyↄ̃ we n yãmana yaikɛo. 
N ma ka wɛ̃ni zɛ́wa, n kĩ́i pↄna ìↄ pɛɛau, pↄmaaↄ ku n ↄzĩ gↄↄpii.