Soũↄ.
19.
Davidi lɛ. 
Musu ì Lua gawi bↄ gupuau, bàluma pↄ́ↄ ì aà zĩ ↄlↄnɛ́. 
Ìↄ yãdanɛ́ lá gu lɛ́ dↄ, ì dↄ̃a kpámá gwã́ ń gwã́o. 
Ìli yã'oo, aà yã'oa bui kuo, wìli a kĩ́a mao. 
Aà lↄↄ ì gɛ́ dṹnia guu píi, aà yã'oa ì gɛ́ e tↄↄlɛ lɛ́wa. Lua kpɛdↄ̀ ĩatɛ̃ɛ we, 
ì bↄ kpɛ́u à bilɛ lán nↄsɛnawa, ì fɛlɛ ń táo ń pↄnao lán nɛgↄ̃nawa. 
Ì fɛlɛ luabɛ lɛ́la, ì pãa gɛ́ e a lɛ́le, pↄe líↄ ulɛa a pusuio. 
Dii ikoyã paɛa, ì ń nↄ̀sɛ níninɛ́. Dii yã́ náai vĩ, ì lɛda ↄ̃nↄsaideↄwa. 
Dii ì ↄtona dↄnɛ́ súsu, ì ń pↄ kɛ na. Dii yãdilɛaↄ gbãsĩ vĩo, ì ń oa weenɛ́. 
Misiilɛa Diiɛ zɛ́pi wɛbↄa, waↄ tɛi gↄↄpii, Dii yã́kpalɛkɛa sĩana vĩ, yã́pi ìↄ maa wásawasa. 
Aà yãmaa dɛ vuaa, baa vua maa, a na dɛ zↄ́'ia, baa zↄ́ bùsu. 
Ni lɛda mapi n zↄ̀blenawa, gbɛ̃́ pↄ́ n yã́ kũa ài ìↄ zↄ̃ↄ. 
Démɛ a fↄ̃ yã́ pↄ́ álɛ zãwàↄ dↄ̃i? Sùuukɛmanↄ ń ma tàae pↄ́ ulɛaↄ. 
Ńsu to mapi n zↄ̀blena dↄ́ɛnnↄo, duuna su gbãableao, míↄ kú wásawasa tàae zↄ̃ↄ sai. 
To yã́ pↄ́ lɛ́ bↄ ma lɛ́u ń làasoo pↄ́ kú ma sↄ̃uo kangu Dii, ma gbɛsi, ma Suabana.