Soũↄ.
27.
Davidi lɛ. Dii mɛ́ ma gupua ũ, ma Suabana ũ, dé má vĩakɛɛ̀i? Dii mɛ́ ma ulɛkĩi ũ, dé vĩa mɛ́ a ma kṹi? 
Tó gbɛ̃vãiↄ sìmazi ma taitaia yã́i, ge tó ma ibɛɛↄ ń ma wɛ̀lɛↄ ã̀naa, aa gɛ̃mbↄlɛ aa lɛ́lɛ. 
Baa tó zĩgↄ̃ↄ koezↄ̃̀mazi, ma sↄ̃ a vĩo. Baa tó gbɛ̃́ↄ fɛ̀lɛa ń zĩo, ma sↄ̃ aↄ dilɛaɛ. 
Yã́ mɛ̀ndo málɛ a wabikɛ Diiwa, yã́pi málɛ wɛɛlɛ maamaa. Má ye màↄ ku Dii ua e ma gↄↄ lɛ́waɛ, kɛ́ màↄ aà aɛya aà kpɛ́u we, mí wɛ́pɛ aà kɛfɛnkɛwa. 
A ma ulɛ a kpɛ́u taasikɛgↄↄ, a ma gwa a zwã̀akpɛu, i ma zɛ gbɛ musu aafia. 
Ma mi a fu ma ibɛɛ pↄ́ liaamaziↄla, mí sa'o Dii ua ń gulakɛao, mí lɛsi mà aà táasilɛ. 
Tó ma lɛzùnzi Dii, wea. Ma wɛ̃nagwa ní ma yãma. 
Ma nↄ̀sɛ lɛ́ lɛdaa mà n aɛya, Dii, málɛ n aɛya. 
Ńsu mikpɛdↄ mapi n zↄ̀blenaɛo, ńsu bↄ ma kpɛ ń pↄfɛ̃oo. Ma Dↄnlɛden n ũ, ńsu ma vũaao, Lua ma Suabana, ńsu ma to weo. 
Tó ma de ń ma dao pãkpàmazi, Dii a ↄliamazi. 
Dii, ma da n zɛ́wa, dↄaamɛɛ zɛ́ súsu guu ma kpàkpanaↄ yã́i. 
Ńsu to ma ibɛɛↄ ń pↄeã kɛao, asa seelade ɛgɛnaↄ lɛ́ yãdↄa, mɛ́ gbɛ̃́ pãsĩↄ lɛ́ pↄbↄ ń níu. 
Má yã́ɛ bee náai vĩ kɛ́ má e: Dii a maakɛmɛɛ dṹniaɛ bee guu. 
Wɛdↄ Diizi. Zɛ gbãa, ní sↄ̃dilɛ. Wɛdↄ Diizi.