Soũↄ.
35.
Davidi lɛ. Dii, íbɛlɛsɛ ń ma ibɛɛↄ, zĩka ń gbɛ̃́ pↄ́ aalɛ kamanↄↄ. 
Ǹ n sɛ̀ngbao ń n gↄ̃kɛbↄↄ sɛ́lɛ, ní fɛlɛ dↄmalɛ. 
Ǹ n sↄ̃na ń n fɛ̃ndao sɛ dↄ, gɛ da gbɛ̃́ pↄ́ pɛ̀lɛmaziↄlɛ. Omɛɛ ma Suabanan n ũ. 
To gbɛ̃́ pↄ́ lɛ́ ma wɛↄ kpɛkpa, wí i ń kṹ. To gbɛ̃́ pↄ́ lɛ́ vãikpaaĩmanↄↄ fua, mí ń kpɛ e. 
Aaↄ dɛ lán ése ṹa pↄ́ ĩ́ana sɛ̀lɛwa, Dii Malaika i pɛ́lɛńzi. 
An zɛ́ àↄ gusia vĩ ń zãanao, Dii Malaika i ↄzↄ̃ńzi. 
Asa aa ɛyↄ̃̀mɛɛ pãɛ, mi yãe kɛnɛ́o, ↄ̃ aa ba kpàmɛɛ. 
To músi ń le, i kɛnɛ́ zãma ũ. To ba pↄ́ aa kpàmɛɛ ń kṹ, aai lɛ́lɛ ɛ pↄ́ aa yↄ̃̀pi guu. 
Ma pↄ i gbasa kɛ Diiwa na, mí pↄnakɛ kɛ́ à ma suabà yã́i. 
Má o ń nↄ̀sɛmɛndoo, Dii, démɛ kànwai? Ni taasideↄ si gbãamↄnɛdeↄwa, ni wɛ̃nadeↄ bↄ ń wɛtãnaↄ ↄzĩ. 
Seelade ɛgɛnaↄ ì fɛlɛmanↄ, aaì yã́ pↄ́ má a yã́ dↄ̃o lalaa. 
Aaì maa fĩabomɛɛ ń vãio, ↄ̃ ma gↄ̃ gbɛ̃ando ũ. 
Tó aalɛ gyãkɛ yãa sↄ̃, mi zwã̀nkasa daɛ, mi azĩa kɛ̃́sã ń lɛyeao, mi wabikɛnɛ́ láasai, 
lá aa dɛ ma gbɛ̃na ge ma gbɛ̃́ ũwa. Miↄ bɛ mipɛlɛa ń oosisio, lá ma da málɛ wɛ̃nakɛɛ̀wa. 
Ãma kɛ́ ma gɛ̃mbↄlɛ, aa kã̀aamazi ń pↄnao, aa ma zãmakɛ̀ aa ã̀naa, aa ĩadàa láasai. 
Aa ma àlafiikɛ̀ pãsĩpãsĩ, aa lɛ́sakã̀mazi. 
Dii, ńyↄ̃ↄ ma gwa màa e bↄɛ ni? Nↄ̀ↄmusupiↄ lɛ́ ma taitai, ma símá màↄ ku. 
Má n tↄbↄ balu guu, má n táasilɛ dasi guu. 
Ńsu to ma ibɛɛↄ tidↄmalao, ńsu to gbɛ̃́ pↄ́ zamagu pãↄ ma gwa ń wɛdooo. 
Yãna lí bↄ ń lɛ́uo, aaì yãdↄ yãkelesaideↄwa. 
Aaì lɛ́ ɛlɛa aa mɛ: Ɛ̃hɛ̃, ɛ̃hɛ̃, wá wɛ́ mɛ́ è. 
Dii, n wɛsìɛ, ńsu ǹyↄ̃ nílɛao, ma Dii, ńsu ǹyↄ̃ zã̀manↄo. 
Ma Lua, fɛlɛ zɛmanↄ, ma Dii, tó yã́ bↄmanↄ na. 
Ni yãkɛ a zɛ́wa Dii, yãnakpaa, ma Lua, ńsu to aa tidↄmalao. 
Ńsu to aa o ń sↄ̃u wa ma nɛo, ńsu to aa o wa ma mↄ bɛ̃̀ɛo. 
Lá aalɛ pↄnakɛ ma yã'ea musu, to wí ń kṹ, mí ń kpɛ e. Lá aalɛ zↄ̃ↄkɛ blea, widamá, ní ń kpɛbↄ. 
To gbɛ̃́ pↄ́ ma bↄa maa ì kɛnɛ́ naↄ pↄnakɛ, aai wiidↄi. To gbɛ̃́ pↄ́ ma bↄa aafia ì káńguↄ o gↄↄpii, Dii mɛ́ zↄ̃ↄ. 
Mapi sↄ̃ má n náaiyã'ò, míↄ n táasilɛ gↄↄpii.