Soũↄ.
58.
Davidi lɛ. 
Gbãadeↄ, i yã'o a zɛ́waa? I yã́kpalɛkɛ ń gbɛ̃́ↄ a zɛ́waa? 
I yã́ kolea wàaipa á sↄ̃ guu, i gbãamↄ gbɛ̃́ↄnɛ á bùsuu. 
Gbɛ̃vãiↄ sã́sãa za ń igↄↄɛ, ɛɛdeↄ ↄ̃̀ↄkpaa za ń da nↄ̀sɛuɛ. 
An lɛgbɛ'i dɛ lán mlɛ̃̀ sɛwɛwa, aa dɛ lán kyã́ pↄ́ a swã́ kàkawa, 
asa ìli a kↄ̃̀ↄ'ona kulɛ'ↄ mao, ìli a wɛliaanɛde gↄ̃i eo. 
Lua, ǹ ń swaa ɛ́'ɛnɛ́ ń lɛ́u, Dii, nↄ̀ↄmusupiↄ kãnkãnaↄ wolo, 
aai gɛ̃zɛa lán í bàalɛawa. Tó aa sagòlɛ, ǹ ń kaↄ ɛ́'ɛ. 
Aa giigaga zɛ́u lán kòlo lɛ́'iwa, aaↄ dɛ lán nɛ́ pↄ́ wa ì gɛ̀, i ĩatɛ̃ eowa. 
E lɛ̀ yàa miↄn tɛ́ àↄ gɛ́ oo wãi, gbɛ̃vãiↄ gɛ̃zɛa ń ĩ́anaoɛ. 
Tó gbɛ̃maaↄ è Lua tↄsìnɛ́ gbɛ̃vãipiↄwa, mɛ́ aa ń gbá pìpi ń ń auo, an pↄ a kɛ na. 
Gbɛ̃́ↄ i mɛ: Gbɛ̃maaↄ ài vĩ fá! Lua ku, ì yã́kpalɛkɛ dṹniau.