Soũↄ.
76.
Asafa lɛ. Wì sí ń kúuↄɛ. 
Wa Lua dↄ̃ Yuda bùsuuɛ, aà tↄ́ gbãa Isailiↄnɛ. 
Aà zwã̀akpɛ kú Salɛma, aà kúkĩi kú Siↄna. 
Kua we à kà wãaↄ ɛ̀'ɛ ń sɛ̀ngbaoↄ ń fɛ̃ndaↄ ń zĩkabↄↄ. 
Ni gupu, niↄ tɛkɛ, n zↄ̃ↄ dɛ gbɛ̀sĩsĩ pↄ́ kú gↄↄpiia. 
N gbãa dɛnla kɛ̀ gↄ̃sa gbãaↄnɛ, aa wúlɛa ń ń i gbɛzão, gↄ̃ gɛ̀bɛɛpiↄ gbɛ̃e i fↄ̃ ↄsɛ̀o. 
Yakↄbu Lua, n ń lele, ↄ̃ sↄ̃deↄ ń ń sↄ̃́ↄ gↄ̃̀ kálɛa ń izↄ̃ↄo. 
Ḿmɛ ń gbɛ̃́ pↄ́ dɛ wà vĩakɛɛ̀ ũ, tó n pↄbↄ̀ n níu, démɛ a fↄ̃ zɛ n aɛi? 
Kua musu n yã́kpalɛkɛ̀, ↄ̃ vĩa dṹnia kũ̀, à gↄ̃̀ kílikili. 
Lua, n fɛlɛ n yãgↄ̃̀gↄ̃ dṹniaɛ, n yɛ̃̀ɛɛsaideↄ suabà. 
Gbɛ̃nazĩna pↄkũma ì n tↄbↄ, n pↄkũma kĩni ìↄ dↄa n piɛ. 
À lɛkɛ Dii á Luawa, í a fĩabo. Á gbɛ̃́ pↄ́ á liaawáziↄ, à mↄ Lua pↄ́ dɛ wàↄ aà vĩa vĩ gba pↄ́. 
Ì kpalablenaↄ kãdɛ, ì to vĩa dṹnia kíaↄ kṹ.