Soũↄ.
81.
Asafa lɛ. 
À guladↄ Lua wá gbãawa. À kúkuakɛ Yakↄbu buiↄ Luaɛ. 
À bↄ ń lɛo, í bala lɛ́ ń mↄↄna'ↄ nao ń domao. 
À kuupɛ mↄbↄzĩ, í pɛ́ a vua zã́ wá dikpɛgↄↄ, 
asa a dɛ ikoyã ũ Isailiↄnɛɛ. Yã́ pↄ́ Yakↄbu buiↄ Lua dìlɛn we. 
À yã́pi dà Yosɛfu buiↄnɛ gↄↄ pↄ́ à ã̀na Egipiↄwa. Aa lↄↄ pↄ́ aai ma yãao mà à mɛ̀: 
Ma aso gò á gã̀u, ma á ↄ bↄ̀ ɛ̃u. 
A wiilɛ̀a taasikɛgↄↄ, ↄ̃ ma á bↄ́, má wèwá asii guu ń louvĩao. Ma á lɛ́ ma á gwá Mɛliba í kĩ́i. 
À swã́kpa ma gbɛ̃́ↄ, mí lɛdawá. Á Isailiↄ, à ma yãma lé! 
Ásu àↄ dii pãle vĩo, ásu kúlɛ dii zĩ̀loɛo. 
Mámɛ má Dii á Lua ũ, ma á bↄ́lɛ Egipiɛ. À á lɛ́ ɛlɛ, mí tó à kã́. 
Ɔ̃ Isailiↄ i ma yãmao, ma gbɛ̃́piↄ i misiilɛmɛɛo. 
Ɔ̃ ma ń tó ń ń swã́gbãao, aa tɛ́ ńzĩa pↄeãi. 
Tó Isailiↄ sↄ̃́amazi, tó ma gbɛ̃́piↄ tɛ ma yã́i, 
dↄ̃ ma ń ibɛɛↄ bùsanɛ́ gↄ̃̀ↄgↄ̃ↄ, ma ↄzↄ̃̀ ń wɛ̀lɛpiↄzi. 
Ma zangudeↄ i vlãnau ma aɛ, an ĩadama aↄ láaa vĩo. 
Mí á gwa ń pↄ́wɛn gawideo, mí gbɛ̀ zↄ́'i kpáwá à kã́.