Soũↄ.
83.
Asafa lɛ. 
Lua, ńsu ǹyↄ̃ nílɛao, ń lɛ́ su àↄ kpaaũao, ńsu ǹyↄ̃ ku kílikilio, Lua. 
Ǹ ń ibɛɛↄ gwa, asa aalɛ kãa, n wɛ̀lɛpiↄ lɛ́ ń mi fu. 
Aalɛ ↄ̃nↄsↄpɛ́lɛ n gbɛ̃́ↄnɛ, aalɛ lɛkpaaĩ ń yenzideↄzi. 
Aalɛ mɛ: À mↄ wà ń buibↄ, an tↄ́ Isaili su àↄ dↄ gbɛ̃egu lↄo. 
Aa lɛkpàaĩ, an lɛ́ kↄ̃sɛ̀, aa lɛdoũkɛ̀ ń kↄ̃o aa fɛlɛnnↄ. 
Ɛdↄũↄ ń Isimaɛla buiↄ ń Mↄabuↄ ń Hagaa buiↄ 
ń Gebalideↄ ń Amↄniↄ ń Amalɛkiↄ ń Filitɛ̃ↄ ń Tiideↄ. 
Baa se Asiliↄ nàmá lↄ, aalɛ ↄda Lↄtu buipiↄwa. 
Kɛnɛ́ lá ń kɛ̀ Madiãↄnɛwa, lá ń kɛ̀ Sisela ń Yabɛ̃oɛ Kisↄ̃i. 
N ń kɛ́ kɛ́lɛkɛlɛ Ɛndoo, aa gↄ̃̀ kálɛa tↄↄlɛ lán pↄgbↄ̃wa. 
Kɛ ń gbɛ̃zↄ̃ↄↄnɛ lá wa kɛ̀ Olebu ń Zeebuoɛwa. Kɛ ń kíaↄnɛ lá wa kɛ̀ Zɛba ń Zalemunaoɛwa. 
Ampiↄ mɛ́ ò yãa aa mɛ̀, wà Lua dã́dãkɛkĩi sɛ́ ń pↄ́ ũ. 
Ma Lua, to aa gↄ̃ lakɛɛ ũ lán ése ṹa pↄ́ ĩ́ana ì sɛ́lɛwa. 
Lá dào ì tɛ́kũ, ge lá tɛ́ ì gbɛ̀sĩsĩ sãsã, 
pɛ́lɛńzi ń n zàao màa, n ĩ́an pãsĩ i to sↄ̃ kɛ̃́ńgu. 
To an gɛɛ gↄ̃ kpá ń wɛ́i, aai n gbãa dↄ̃ Dii. 
Wí líↄ ń kṹ gↄↄpii ń bílio, aa kpɛbↄ aa midɛ, 
kɛ́ aa e dↄ̃ kɛ́ n tↄ́n Dii, ḿmɛ ń Musude ũ dṹniau píi.