Soũↄ.
108.
Davidi lɛ. 
Ma sↄ̃ dilɛa, Lua, má lɛsi mà ń táasilɛ ń nↄ̀sɛmɛndoo. 
Ma mↄↄna ń ma domao, vu! Mí gbãakpa gudↄazi. 
Dii, má ń sáaukpa buiↄ guu, má ń táasilɛ gbɛ̃́ↄnɛ. 
Asa n gbɛ̃kɛ zↄ̃ↄ zↄ̃̀maɛ, mɛ́ n náai zↄ̃̀ luabɛpuanawa. 
Lua, tↄbↄ e à zↄ̃ma, to n gawi li dṹniaa píi. 
Wea, wá suaba ń n gã̀sa gbãao, kɛ́ wápiↄ n gbɛ̃́ yenzideↄ e bↄ. 
Lua yã'ò za a kúkĩi à mɛ̀: Má Sikɛũ kpaalɛ ń tidↄanlaoɛ, mí Suko guzulɛ kpámá. 
Galada bùsuá ma pↄ́ɛ, Manase buiↄ bùsuá ma pↄ́ɛ, Ɛflaiũ buiↄ bùsuá ma mↄ̀ fùaɛ, Yuda bùsuá ma lípanaɛ. 
Mↄabuↄ bùsuá ma zion zu'obↄɛ, mi a kyale kálɛ Ɛdↄũↄ bùsuwa, mi kúkua dↄ Filitɛ̃ↄ bùsuwa. 
Démɛ a gɛ̃manↄ wɛ̃́lɛ bĩ́ideui? Démɛ a dↄaamɛɛ e Ɛdↄũↄ bùsuui? 
Lua, mɛ́ i kɛ n gbɛ̃́ pↄ́ n wá vũaa nili bↄ ń wá zĩgↄ̃ↄ lↄo bàasio. 
Ɔdawá wá ibɛɛↄ yã́i, asa gbɛ̃nazĩna gbɛ̃suabaaá pãɛ. 
Wá zĩble ń Lua gbãao, ↄ̃mɛ a ↄ̃zↄ̃ wá ibɛɛↄwa.