Yáasiↄ.
5.
Ma nɛ́, laaidↄ ma ↄ̃nↄwa, swã́kpa ǹ ma wɛzɛ̃ yãma, 
kɛ́ ǹ e ǹyↄ̃ ku n dↄ̀ↄwa, dↄ̃a iↄ ku n lɛ́u. 
Káalua lɛgbɛ'i ìↄ na lán zↄ́wa, ì ń gálɛ ń lɛ́ nao, 
ãma gbɛzã ì kɛnɛ́ ĩ́i lán gↄ̃iwa, ì ń zↄ̃ lán fɛ̃nda lɛna kpɛplawa. 
Aà zɛ́ ì mipɛńnↄ gawa, ì si ń gbɛ̃́ pↄ́ tɛaziↄ bɛdau. 
Ìli làasookɛ wɛ̃ni zɛ́wao, a dↄ̃ a zã zɛ́piwao. 
Ma nɛ́, swã́sɛ ma yã́i sa, ńsu gi ma lɛdamaio. 
Pãalɛ nↄɛ bee taaɛ zã̀, ńsu ǹ aà bɛ gãaɛ baa vĩo. 
Ńsu ǹ n gbãakpa gbɛ̃pãlewao, ńsu ǹ n wɛ̃ni kpa gbɛ̃́ pãsĩwao, 
kɛ́ n àizɛɛↄ su gↄ̃ dãↄnɛo, mɛ́ n zĩ ài su gↄ̃ ua pãledeↄnɛo. 
Ńyↄ̃ aaukɛ n gↄↄ vlã́wa, ńyↄ̃ ibaba, n yɛ̃̀ɛɛ a láa, 
ní mɛ: Ma gi lɛdamai fá! Ma sakaa totoau mɛ́ tò. 
Mi lɛdamadeↄ yã'onɛ mao, mi swã́sɛ ma yãdanɛdeↄzio. 
Ma gↄ̃a wɛ̃na pↄ́ ũ míↄmiↄ kɛ́ dṹnia ma e zã̀o. 
Ǹ nzĩa ola imi, zɛ ń nzĩa lↄ̀ↄ'io. 
N nibↄna ibↄlɛa bàasi maae? N í gufↄ̃ bↄa gãaɛ zɛvĩo. 
To àↄ dɛ n na pↄ́ ũ ado, asu àↄ dɛ gbɛ̃e pↄ́ ũo. 
To Lua báaada n biapiu, pↄnakɛ ń n ɛ̀waasogↄↄ nↄo. 
N tue báasɛ̃de! N zↄ̃́tɛ̃n kɛfɛna! To bↄ̃̀nↄbleaaànↄ lí kangu gↄↄpii, ní aà báasɛ̃ nidɛ lá gu lɛ́ dↄ. 
Ma nɛ́, bↄ́yãi ńyↄ̃ nↄ pãle nidɛi? Bↄ́yãi ńyↄ̃ bↄ̃̀nↄble ń nↄ pↄsɛoi? 
Gbɛ̃nazĩnaↄ yãkɛae ulɛa Diiɛo, ìↄ zɛ́ pↄ́ aa sɛ̀ dↄ̃ píi. 
Vãikɛna tàae ì aà kṹ, aà duuna ì ba zuɛ̀. 
Aà lɛdamamasai a aà kpa gai, aà sↄũkɛ zↄ̃ↄ a aà sã́sã.