Yáasiↄ.
14.
Nↄɛ ↄ̃nↄde ì ua kálɛ, a faasaide sↄ̃ ì ua fãaa. 
Gbɛ̃́ pↄ́ ì yãkɛ a zɛ́wa Dii vĩa vĩ, zɛkoleasɛna ì sakaaàgu. 
Faasaide lɛ́ mɛ́ aà gbɛ̃bↄ ũ, ↄ̃nↄna yã'oa ì aà bↄ. 
Tó zu kuo, gba ìↄ da giiɛ, wì ài zↄ̃ↄ e ń zuↄ gbãao. 
Seelade sĩande lí ɛɛtoo, seelade vãi yã́ ìↄ mↄafili vĩ. 
Láanide ì kpálɛkɛ ↄ̃nↄi à kuawà, laaide yãdↄ̃aá faaiɛ. 
Kɛ̃ sↄũwa zã̀zã, asa ńyↄ̃ dↄ̃a ewào. 
Ɔ̃nↄ ì to laaide làasookɛ a zɛ́wa, sↄũ faasaikɛ ì aà sã́sã. 
Faasaideↄ ì saka tàae kulɛkɛau, gbɛ̃maaↄ ìↄ na ń kↄ̃o. 
Baade azĩa yã'ↄ̃ma dↄ̃, mɛ́ gbɛ̃́ pↄnaá gbɛ̃pãle pↄ́ no. 
Gbɛ̃vãiↄ ua a midɛ, gbɛ̃maaↄ bɛ a ↄta. 
Zɛ́ kú ì kɛ gbɛ̃́ↄnɛ maa, ãma a midɛkĩiá gaɛ. 
Baa yaalↄ guu nↄ̀sɛ ì ↄ̃̀ↄkpa, pↄna ku ì midɛ ń pↄsiao. 
Pↄ̀ↄbↄzãkɛna yãkɛa ì wi aà musu, gbɛ̃maa ì a yãkɛa gbɛ'e. 
Làasoosaide ì yã́pii siɛ, laaide lí yã́ náaikɛ làasookɛsaio. 
Ɔ̃nↄna vãikɛa vĩa vĩ, ì ɛ̃ɛ̀, sↄũ ì azĩa náai vĩ, ìↄ wãa. 
Pↄkũmade ì yã́ yãfũna kɛ, kↄ̃nide ì to wà zaagu. 
Ɔ̃nↄkɛ̃sãmade ì gↄ̃ faasai, laaideↄ ì dↄ̃a kpa fùa ũ. 
Gbɛ̃vãiↄ misiilɛ gbɛ̃maaↄnɛ, vãikɛnaↄ kúlɛ nↄ̀sɛpuadeↄ kpɛɛlɛ. 
Baa taaside gbɛ̃́dee ì zaaàgu, ãma ↄde gbɛ̃naↄ ìↄ dasi. 
Sakaa n gbɛ̃́deeguá duunaɛ. Báaaden gbɛ̃́ pↄ́ ì wɛ̃nadↄ̃ taasideↄnɛ ũ. 
Vãi wàaipanaↄ sã́sãao lé? Maa wàaipanaↄ sùuu vĩ ń náaio. 
Mɛkpaa zĩwa ìↄ ài vĩ, mɛ́ yãbↄlɛ ì ń kɛ̃́sã. 
Ɔ̃nↄnaↄ àizɛɛ ì gↄ̃ ń gawi ũ, sↄũↄ faasaikɛ ì ń gↄ̃ faasai. 
Seelade sĩande ì gbɛ̃́ misi, a ɛɛde yã́ mↄafili vĩ. 
Vĩakɛa Diiɛá gbãa'ekĩi náaideɛ, a dɛ misikĩi ũ ade nɛ́ↄnɛ. 
Vĩakɛa Diiɛá nibↄna wɛ̃nideɛ, ì ń bↄ ga lɛ́zĩ. 
Tó kía gbɛ̃́ↄ dasi, ìↄ gawi vĩ, bùsugbɛ̃saikɛá kpalablena músiɛ. 
Gbɛ̃́ pↄ́ a pↄ lí pa kpaao wɛ́ kɛ̃a, pↄkũmade ì a yãfũkɛ sɛ lɛsĩ. 
Sↄ̃daadoũ mɛ́ mɛ aafia ũ, wɛdↄanɛ ì mɛkɛmuuna zĩmá. 
Wɛ̃nade wɛtãna ì aà Kɛna kpɛbↄ, taaside wɛgwana ì aà Kɛna kpɛla. 
Tó yã́ vãikɛna lè, ì aà nɛɛ, baa tó gbɛ̃maa gà, a ulɛkĩi vĩ. 
Ɔ̃nↄ ì zↄ̃lɛkĩi e wɛzɛ̃na nↄ̀sɛu, ãma wìli e sↄũwao. 
Yã́zɛde ì bui sɛ lɛsĩ, duuna ì wida gbɛ̃́ↄwa. 
Zↄ̀blen laaide yã́ ì ka kíagu, ãma ì a pↄkũmabↄbↄ a gianawa.