Yáasiↄ.
17.
Pɛ̃ɛ miↄn giina soa yãkelesai maa dɛ nↄ̀ↄgbɛ̃a ua sòledeula. 
Zↄ̀ laaide ìↄ iko vĩ nɛ́ giawaɛ, aà baa aↄ ku ua túbi guu. 
Wì ã́nusu ń vuao baasa, Dii mɛ́ ì wá sↄ̃ tàasika. 
Gbɛ̃vãi swã́ ìↄ na ń yãdↄↄsaio, ɛɛde laai ìↄ ku lɛkpɛdaamáwa. 
Gbɛ̃́ pↄ́ ì taaside kɛ pↄ́ↄpↄↄ lɛ́ saka aà Kɛnaguɛ, gbɛ̃́ pↄ́ ì gbɛ̃́ yáalↄ músiwa a bↄ pão. 
Tↄũnaↄ mɛ́ ń deziↄ gawi ũ, maeↄ mɛ́ ń nɛ́ↄ ĩ́andãbↄ ũ. 
Yã́zɛde oa lí kↄ̃si ń sↄũoo, màa ɛɛ lí kↄ̃si ń bɛɛɛde lɛ́oo. 
Gbagusaɛ dɛ zĩakɛkɛa ũ a danaɛ, gu pↄ́ à lìliu píi aà tá ìↄ naɛ. 
Gbɛ̃́ pↄ́ lakà tàae pↄ́ wa kɛ̀ɛ̀la ye wàↄ yeaziɛ, yãzifɛlɛna sↄ̃ ì gbɛ̃kɛ bↄaa. 
Ɔ̃nↄna gbaa laai ì tↄ̃wà dɛ sↄũ gbɛ̃a gɛ̃n basↄola. 
Yãvãi mɛ́ ì dↄaa swã́gbãadeɛ, wa zĩna sósobisaide gbaɛwà. 
Kpaaũa ń wài pↄ́ wà a nɛ́ sɛ̀lɛo sã̀ↄ dɛ kpaaũa ń sↄũo a mìsaikɛula. 
Tó gbɛ̃maa fĩabò ń vãio, vãi a kɛ̃ aà uawao. 
Lɛkpaadaa dɛ lán ízɛwɛ̃awaɛ, go we e sòle àↄ gɛ́ fɛlɛi. 
Yãnakpaa tàaedewa ń yãdaa yãesaidelao, Dii za yã́ beeↄu píiɛ. 
Bↄ́ ài sↄũ ↄ̃adɛa a kyodↄ̃a yã́i vĩi? Asa a nↄ̀sɛ vĩo. 
Gbɛ̃naↄ ìↄ yekↄ̃i gↄↄpiiɛ, vĩ̀i ń dãunaↄ ku dↄ̃a kↄ̃ɛ yã́iɛ. 
Mìsaide ì a gbɛ̃do fĩa di a miwa, ì kpɛ́gaausí a gbɛ̃́deeɛ. 
Gbɛ̃́ pↄ́ ye sòlei ye duunaiɛ, yã́gbãa'ona ì músi'i azĩaɛ. 
Làasookpaanlade lí maa eo, lɛfↄlↄde ì lɛ́lɛ da taasiu. 
Sↄũ'ina pↄ ìↄ siaɛ, faasaide mae pↄ líↄ nao. 
Nↄ̀sɛnaá ɛsɛ maaɛ, pↄsia ì ń ibaba. 
Vãikɛna ì gbagusaɛ sↄlↄ a ulau kɛ́ à e yã́zɛde bãdɛò yã́iɛ. 
Laaide ì wɛbii ↄ̃nↄwa, ãma sↄũ wɛ́pɛkĩi ìↄ zã̀ɛ. 
Nɛ́ sↄũ ì a mae pↄ ya, ì a da'ia nↄ̀sɛ ↄ̃̀ↄkpaɛ̀. 
A maa wà yãesaide yíao, bɛɛɛde gbɛ̃a a nↄ̀sɛmaa yã́i zɛvĩo. 
Gbɛ̃́ pↄ́ ì a lɛ́ fↄ̃́ dↄ̃a vĩ, nↄ̀sɛniɛde ìↄ laai vĩ. 
Baa sↄũ, tó à a lɛ́ fↄ̃̀, wì aà dilɛ ↄ̃nↄna ũɛ, gbɛ̃́ pↄ́ ì a lɛ́ kúá laaideɛ.