Yáasiↄ.
22.
Tↄ́ na dɛ àizɛɛa, na ń gbɛ̃́ↄ dɛ vua ń ã́nusuola. 
Ɔde ń taasideo zĩ́na doũɛ, Dii mɛ́ ń kɛ́ píi. 
Laaide ì dↄaa vãi e, ↄ̃ ì ulɛɛ̀, ↄ̃nↄsaide ì gi àↄ gɛ́, ↄ̃ ì wɛ́tɛ̃a e. 
Zĩabusaa vĩakɛa Diiɛ guu gbɛ mɛ́ àizɛɛ ń bɛɛɛo ń wɛ̃nio ũ. 
Lɛ ń baio ku gbɛ̃́ dↄ̀ↄsai zɛ́u, gbɛ̃́ pↄ́ ye aafiai ì kɛ̃́má. 
Ɛ̀waasona da zɛ́ pↄ́ dɛ aà sɛwa, tó à zↄ̃ↄkũ̀, a bↄuo. 
Ɔde ì gbãamↄ taasideɛ, pↄsɛ̃ana ì zↄble pↄdeɛɛ. 
Gbɛ̃́ pↄ́ vãi tↄ̃̀ a yã'e a kɛkɛgↄↄ, aà pãsĩkɛgo a aà gbɛ̃. 
Lua a báaada gbɛ̃́ pↄ́ gbɛ̃kɛ vĩgu kɛ́ ì blɛli taasideↄnɛ yã́i. 
Láanide yá, sòle i midɛ, yãkele ń wío i láa. 
Nↄ̀sɛpuade pↄ́ a lɛgbɛ'i na, ↄ̃mɛ aↄ dɛ kía gbɛ̃na ũ. 
Dii ìↄ wɛ́tɛ dↄ̃ai, ì mↄafilide ɛɛkaɛ̀ a ↄzĩ. 
Màade ì mɛ nↄ̀ↄmusu ku bàasi, a ma dɛ gãaɛɛ. 
Káalua lɛ́á ɛ̀ zòoloɛ, gbɛ̃́ pↄ́ Dii láaizĩ̀wà ì lɛ́lɛ dau. 
Faasaiyã ìↄ dↄ nɛ́ↄ sↄ̃wa, totoa ń flão a to aa kɛ̃wà. 
Gbãasaide wɛtãa ì aà kã́fĩ, ↄde gbaa pↄ́ ì aà kɛ̃́sã. 
Swã́kpa ǹ ↄ̃nↄnaↄ yã'onɛ ma, ǹ n nↄ̀sɛ wɛ̃ ma yãdanɛɛ, 
asa a maa ǹyↄ̃ kũa n sↄ̃ guuɛ, iↄ dↄ n lɛ́u. 
Baa mpi, málɛ yãdanɛ gbã, kɛ́ ǹyↄ̃ Dii náai vĩɛ. 
Ma yã'onɛ kɛ̃̀nɛ mɛ̀n baakwi, yã́piↄ lɛdama ń dↄ̃ao vĩ. 
Málɛ yã́ pↄ́ sĩana vĩ danɛ, kɛ́ ǹ e ǹ yã́zãsimá a zɛ́waɛ. 
Ńsu gbãasaide ble aà gbãasaikɛ yã́io, ńsu gbãamↄ wɛ̃nadeɛ yã́kpalɛkɛkĩio. 
Asa Dii a yã́sińnↄɛ, i gbɛ̃́ pↄ́ lɛ́ ń wɛtãↄ wɛtã. 
Ńsu gbɛ̃́kpa ń pↄkũmadeoo, ńsu bɛbɛ ń pↄfɛ̃deoo, 
kɛ́ ńsu ǹ aà dàa sɛ́lɛ ǹ nzĩa kpa yã́io yã́i. 
Ńsu gbɛ̃pãle fĩa di n miwao, ńsu kpɛ́gaausíɛ̀o. 
Tó ń pↄe vĩ ǹ fĩaboòo, wa n wúlɛbↄ sɛ n zíɛɛ. 
Ńsu kↄↄ baa vĩo, n deziↄ mɛ́ dà za zi. 
Ń gbɛ̃́ pↄ́ gↄ̃i vĩ a ↄzĩ guu dↄ̃a? Ade a zĩkɛ kíaↄnɛɛ, ì kɛ táaaↄ a kɛnɛ́o.