Salomↄↄ lɛ.
8.
Tó ma dãↄn n ũ wa yↄ̃́ mì wá kpàkↄ̃wa yãaɛ lé! Tó ma kpaaũnnↄ bàasi, dↄ̃ má lɛ́pɛma, wa sakamaguo. 
Dↄ̃ ma gɛnnↄ ma da'ia kpɛ́u, mí vɛ̃ɛ gĩ na kpama ǹ mi ń gbɛafu í nanao. 
Aà ↄzɛɛ ku ma mi zíɛ, aà ↄplaa liaamazi. 
Yelusalɛũ nɛnↄnaↄ, ma naɛ́ Luazi, ásu dúsakũkpawɛ̃ɛo, ásu wá báasɛ̃ gbooo e a lɛ́ ká. 
Démɛ bↄ̀ gbáau, àlɛ mↄ́, àlɛ gbãa'e a yenzidewa keei? Nↄɛ Ma n vu mao lí gbáu, wekĩi n da n nↄsìu, wekĩi nↄwãwã mↄ̀uwà ↄ̃ à n i. 
Ma na n sↄ̃wa lán seelakɛbↄ pↄ́ wì da ń nↄɛ ge ń ↄwawa, asa yeagↄ̃ɛi ì mↄ́má lán gawaɛ, báasɛ̃pi pãsĩ lán mia'ɛwaɛ. Ì namá lán tɛ́waɛ, ì kṹmá lán tɛ́ sà zↄ̃ↄwaɛ. 
Baa ísi a fↄ̃ báasɛ̃ tɛdɛo, baa swada í a fↄ̃ daao. Tó gbɛ̃́ a bɛ àizɛɛↄ kpà píi báasɛ̃ lua yã́i, wa sakaaàgu búubuuɛ. 
Wá dãuna vĩ, i yↄ̃́ bↄbↄo. Kpelewa wá kɛ tó gbɛ̃e ye gɛ̃ aà yã́ui? 
Tó a dɛ bĩ́i ũɛ, wá gulɛsĩↄ bowà ń ã́nusuoɛ. Tó a dɛ bĩ́ibↄlɛ ũɛ, wá káka ń sɛdɛ líoɛ. 
Bĩ́in ma ũ, ma yↄ̃́ mɛ́ a gulɛsĩↄ ũ, ↄ̃ má dɛ ma yenzideɛ gbɛ̃́ pↄ́ ì aafia iɛ̀ ũ. 
Salomↄↄ vɛ̃ɛbu vĩ Baalamↄ, à búpi nà gbɛ̀winaↄnɛ ń ↄzĩ. An baade líↄ fĩabo ã́nusu ↄwatɛ̃ ↄ̀aasↄsↄo. 
Salomↄↄ, má azĩa vɛ̃ɛbu vĩɛ, má ã́nusu ↄwatɛ̃ ↄ̀aa sↄo kpama, mí a ↄ̀aa do kpa vɛ̃ɛbu zĩkɛnaↄwa. 
N gbɛ̃́ pↄ́ niↄ ku kaaↄ guu, wì swãdↄnzi, to mà n lↄↄ ma. 
Ma yenzide, mↄ kpakpa, ní kɛ lá tue ge bùasan bↄlↄna ì kɛ sĩ̀sĩ pↄgĩnadeↄ musuwa.