Isaia.
35.
Gbáa ń gugiio a pↄnakɛ, guwaiwai a yáalↄ, kpaa a bↄlɛu. 
A vukɛ ń pↄna zↄ̃ↄo, a gulakɛ. Libã gawi a gↄ̃ɛ̀, Kaamɛli ń Salↄnao maa a pisiwà, wi Dii wá Lua gawi ń a zↄ̃ↄkɛo e. 
À á gã̀sĩ pↄ́ gↄ̃̀ dↄáziↄ zu, à á gbá pↄ́ gↄ̃̀ tèeeↄ sɛ́. 
À o gbɛ̃́ pↄ́ an kã́ gàↄnɛ: À sↄ̃dilɛ, ásu to vĩa á kũo. À gwa! Á Lua lɛ́ mↄ́ tↄsiiɛ́, àlɛ mↄ́ fĩaboinɛ́, i á suaba. 
Vĩ̀aↄ wɛ́ a kɛ̃́, swãdoↄ swã́ a wɛ̃, 
ɛɛↄ vĩvĩ lán banawa, lɛ́nanaalɛadeↄ gulakɛ, asa gbáa a pũna ń ío, gugii a li swa ũ. 
Tↄↄlɛ wãa a li íkalɛkĩi ũ, gugii a gↄ̃ nibↄna ũ. Gbɛ̃gbonaↄ kálɛkĩi a vↄ̃́ ń wáao ń swamↄeo bↄlɛ. 
Wa zɛda bↄ we, wa mɛ zɛ́piɛ zɛ́ pↄ́ a kua adoa. Gbã̀lɛnaↄ sɛo, sↄũ a bɛbɛ kpa a ãao, zɛ́pi aↄ dɛ a sɛnaↄ pↄ́ ũɛ ńtɛ̃ɛ. 
Nↄ̀ↄmusu aↄ ku weo, wàie a sↄ̃io, wa wɛsi wàilɛ weo. Gbɛ̃́ pↄ́ Lua ń suabàↄ mɛ́ aaↄ bɛ we, 
gbɛ̃́ pↄ́ Dii ń bópiↄ ɛa su, aa gɛ̃ Siↄna ń kúkuakɛao, pↄna láasai kú ń musu, pↄna ń yaalↄo gɛ̃ńzi, pↄsia ń wɛ̃nao gɛ̃zɛa.