Zelemii.
20.
Kɛ́ sa'ona Pasuu, Imɛɛ nɛ́ pↄ́ dɛ Dii kpɛ́ gbɛ̃zↄ̃ↄe ũ Zelemii ãnabikɛkɛapi mà, 
a tò wà aà gbɛ̃̀ wà aà dàliu Dii kpɛ́ bↄlɛ pↄ́ wì mɛ Bɛ̃yãmɛɛ Bↄlɛ Musu saɛ. 
Kɛ́ gu dↄ̀ Pasuu Zelemii bↄ̀ líu, ↄ̃ Zelemii òɛ̀: Dii a onɛ Pasuu lↄo, sema Vĩapↄↄliaai. 
Asa ma Dii ma mɛ̀, má tó ǹ gili gɛ̃ nzĩau ń n gbɛ̃naↄ píiɛ. An ibɛɛↄ ń kwɛ́ zĩ guu, ńyↄ̃ wɛsiɛ. Má Yudaↄ na Babɛli kíaɛ a ↄzĩɛ, i tá ń ń gbɛ̃eↄ Babɛli, i ń gbɛ̃eↄ dɛdɛ zĩ guu. 
Má wɛ̃́lɛɛ bee àizɛɛↄ na ń ibɛɛↄnɛ ń ↄzĩɛ, a buapↄ́ↄ píi ń a pↄ́ bɛɛɛdeↄ píi ń pↄ́ pↄ́ kú Yudaↄ kía làasiuↄ, aai naaa taò Babɛli. 
Mpi sↄ̃ Pasuu ń n bɛdeↄ píi, wa táánↄ Babɛli zĩ̀zↄↄ ũɛ. We ńyↄ̃ gau, wa n vĩ ń n gbɛ̃na pↄ́ n ãnabi'ɛgɛnakɛ kɛ̀nɛ́ↄ. 
Dii, n kↄ̃nikɛ̀mɛɛɛ, ↄ̃ ma n yã́zɛ è, n gbãamↄ̀mɛɛɛ, ↄ̃ n ma fu. Ɔ̃ ma gↄ̃ pↄ́ yáalↄa ũ, gbɛ̃́pii ìↄ ma láanikɛɛ. 
Tó málɛ yã'o píi, wii mi lɛ́, mi wɛ́tɛ̃a ń pↄkaalɛao kpàwakɛ. Dii yã́ mɛ́ tò wì ma sↄ̃́sↄ̃, wìↄ ma kɛ pↄ́ↄpↄↄ za kↄↄ e oosi. 
Tó ma mɛ̀ má aà yã́ dↄ gbɛ̃́ↄguo, má yã'o ń aà tↄ́o lↄo, aà yã́pi ìↄ ma sↄ̃ tɛ́kũɛ, ìↄ dɛ lá wà tɛkà ma mɛ guuwaɛ. Yã́pi kṹkũa ì ma wãɛ, má fↄ̃o. 
Asa mi ma wìↄ vãikpaaĩmanↄ dasi, wìↄ mɛ, Vĩapↄↄliaai. À aà kↄmalɛkɛ! Wà aà kↄmalɛkɛ! Ma gbɛ̃́ↄ wɛ́ ìↄ dↄ ma lɛ́lɛaiɛ, aaì mɛ, tó à zã̀ yã́wa, wá aà fuɛ, wí tↄsiwà. 
Ń beeo Dii kumanↄ nɛgↄ̃n pãsĩ ũ, a yã́i ma wɛtãnaↄ kpagua. Aa fua, wí i ń kṹ. Aa tidↄmalao, aai gↄ̃ ń tↄ́ ĩ́io. 
Dii Zĩgↄ̃de, gbɛ̃maa tàasikana, ni nↄ̀sɛ ń làasooo gwagwa. Tↄ símámɛɛ mà gwa, asa ma azĩa nànɛ n ↄzĩɛ. 
À lɛsi Diiɛ à aà táasilɛ! Asa ì wɛ̃nade bↄ vãikɛnaↄ ↄzĩɛ. 
Gↄↄ pↄ́ ma da ma iwà gↄ̃ láaipↄ ũ, ma igↄↄpi su báaa kɛo. 
Gↄ̃ɛ pↄ́ gɛ̀ a baokpà ma maeɛ, à aà pↄ kɛ̀ɛ̀ na à mɛ̀, aà na nɛ'ì gↄ̃ɛ ũ, ade gↄ̃ láaipↄ ũ. 
Gↄ̃ɛpi gↄ̃ lán wɛ̃́lɛ pↄ́ Dii ń fuangba ń wɛ̃nagwasaiↄwa. Aàliↄ búbua ma kↄↄ, iliↄ zĩkawii ma fãanɛ. 
Asa i ma dɛ nɛasakpɛu ma da gbɛɛ gↄ̃̀ ma mia ũ aà nɛasakpɛ gↄ̃̀ dↄ ma papa ũ gↄↄpiio. 
Bↄ́mɛ tò ma bↄ nɛasakpɛpiu la? Taasi ń pↄsiao ↄ̃ má dↄ̃, ma gↄↄ a pa ń wíoɛ.