Ozee.
6.
À mↄ wà ɛa ta Diiwa. Ɔ̃mɛ wá taitai, kási a wá gbã́gbãɛ. Ɔ̃mɛ wá kɛ́ ĩa, kási a ɛsɛkɛwàwɛ̃ɛɛ. 
Gↄↄpla gbɛa a wá lɛ́ ń láo, a gↄↄ àaↄ̃de zĩ́ i wá fɛlɛ, wíↄ kuaànↄ. 
Wà Dii dↄ̃ wà pɛ́lɛ aà dↄ̃ai. Lá gudↄa sea vĩo, a bↄ mↄ́wá, a mↄ́wá lán káabuan louwa, lán lou gbɛzã pↄ́ ì kwɛ tↄↄlɛwawa. 
Ɛflaiũ buiↄ, bↄ́ má kɛánↄi? Yudaↄ, bↄ́ má kɛánↄi? Á yeamazi dɛ lán suawaɛ, lán kↄↄkↄↄ fíi pↄ́ ì gɛ̃zɛawa. 
A yã́i tò ma á zↄ̃́ɛzↄ̃ɛ ń yã́ pↄ́ bↄ̀ ma lɛ́uo, ma á dɛdɛ ń ma ãnabiↄ yã́o. Ma yã́kpalɛkɛaánↄ bↄ̀ lán loupilɛawa. 
Gbɛ̃kɛkɛakↄ̃ɛ ↄ̃ má yei, i kɛ ma gbagbaa no. Ma dↄ̃a Lua ũ maa dɛ sa pↄ́ wì a pↄ́ kátɛu à tɛ́kũa. 
Aa ma bàakuańnↄ yã́ gbòo, aa bↄ ma kpɛ Adama. 
Galada bùsudeↄá yãvãikɛnaↄnɛ, gbɛ̃dɛ'au mɛ́ ìↄ tɛ́ ń iau. 
Lá gbãamↄnɛdeↄ ì gbɛ̃́ↄ kpákpa, màa sa'on gãliↄ ì kɛ, aaì gbɛ̃́ↄ dɛdɛ Sikɛũ zɛ́u, we aaì dàakɛunɛ́. 
Ma yã́ pↄ́ ì dimá è Isailiↄwa, Ɛflaiũ buiↄ ńzĩa kpà gbãsĩkɛawa, Isailiↄ gbãlɛ̀. 
Á Yudaↄ sↄ̃ a ma vãikɛa guu, a ka kɛkɛa!