Mise.
2.
Waiyoo yãbɛ̃ɛ lɛkpaaĩnaↄ, gbɛ̃́ pↄ́ aaì vãi làasookɛ ń lii musuↄ! Tó gu dↄ̀, aaì zĩkɛwà, kɛ́ aa a zɛ́ vĩ yã́i. 
Aaì lua buai aa símá, aaì wɛdↄ kpɛ́i aa kɛ ń pↄ́ ũ. Aaì gbãamↄ gbɛ̃́ɛ, aa aà bɛ ge aà túbi síwà. 
Ayãmɛto ma Dii ma mɛ̀: Má dìlɛ mà yã́yia gbɛ̃́ɛ beeↄwa, aa e bↄuo. Aa táa'o ń mio daa ía lↄo, asa wɛ́tɛ̃agↄↄɛ. 
Gↄↄ bee wa yãadańnↄ, an yã́ i gↄ̃ wɛ̃nalɛ ũ wa mɛ: Wà wá ásookɛ̀, wà wá gbɛ̃́ↄ bùsu sìmá, wàlɛ wá bugbɛↄ kpaalɛkↄ̃ɛ ń luayãdↄ̃nsaiↄ. 
A yã́i áↄ gbɛ̃e vĩ Dii gbɛ̃́ↄ kↄ̃kãaau à bùsu kpaalɛ ń gbɛlaaoo. 
Ãnabi ɛgɛnaↄ yãbↄ̀lɛ aa mɛ̀: Wasu ãnabikɛkɛ yã́ bee musuo, wí a wá kũo. 
Yakↄbu buiↄ, màa álɛ oa? Dii pↄ ì pa kpaa yã̀? Aà yãkɛan wea? Dii mɛ̀: Ma yã́ líↄ maa gbɛ̃́ pↄ́ ì yãkɛ a zɛ́waɛo lé? 
I fɛlɛ ń ma gbɛ̃́ↄ lán ibɛɛↄwa, i gbɛ̃́ pↄ́ yãe daaoↄ ulaↄ símá, lán gbɛ̃́ pↄ́ aalɛ su ń zĩlaoↄwa. 
I ma gbɛ̃́ nↄɛↄ ya ń bɛ maau, i ń nɛ́ↄ kɛ̃ ma gawiwa gↄↄpii. 
À fɛlɛ tá! Á zↄ̃lɛkĩin lao. Bùsuɛ bee gbãlɛ̀, à ↄ̃̀ↄkpà à kaalɛgyã sɛ̀. 
Tó mↄafilide mↄ̀ ɛɛtò à mɛ̀ á àsi maa o vɛ̃ɛ ń wɛ̃o yã́ musu, ãnabi bee taa gbɛ̃́ɛ beeↄ ìↄ yei. 
Yakↄbu buiↄ, má á naaa píiɛ, má Isaili kↄ̃naↄ kakↄ̃u. Má ń kãaa lán sã pↄ́ kú kaauↄwa, an dã́dãkɛkĩi súu aↄ dↄ ń dasi yã́i. 
Gbɛ̃́ pↄ́ zɛwɛ̃̀nɛ́ a dↄaanɛ́, aa bĩ́ibↄlɛ gboo, aai bↄlɛu. An kía mɛ́ a dↄaanɛ́, ma Dii má zɛmikũnɛ́.