BƆNA.
9.
Dii bè Musanɛ: Ǹ gá ǹ Fili'auna le ǹ onɛ Dii Eberunↄ Luda bè à ma gbɛ̃nↄ gbarɛ aↄ̃ gá dↄnzi kɛmɛ. 
Tó à gì ń gbarɛzi, tó à kpɛ́ ń kũna ai tia, 
mɛ́ ↄ tↄ̃ à pↄ́kãdeenↄa bura. Mɛ́ gagyã pãsĩ ká à sↄ̃nↄn kↄ̃n à zaakinↄ kↄ̃n à lakuminↄ kↄ̃n à zùnↄ kↄ̃n à sãanↄ kↄ̃n à blènↄ. 
Mɛ́ Isaraili pↄ́kãdeenↄ dↄ̃kↄ̃zi kↄ̃n Igipitinↄ pↄ́nↄo. Isarailinↄ pↄ́kãdeenↄ ke é garo. 
Mamↄma Dii ma à gurↄↄ dìɛ. Zian mɛ́ beee kɛ bùsu kɛ̀n. 
Kɛ̀ guu dↄ̀, ben Dii kɛ̀ lɛ. Igipitinↄ pↄ́kãdeenↄ gàga píngi, mↄde Isarailinↄ pↄ́kãdeenↄ kee e garo. 
Fili'auna yã kɛ̀ kɛ̀ pì gbèka, à mà Isarailinↄ pↄ́kãdeenↄ kee e garo, mↄde à swã kpɛ́ gbãa, à gì gbɛ̃ pìnↄ gbarɛzi. 
Dii bè Musanɛ kↄ̃n Arunao: À mↄ̀dakpɛ túbu kↄ ↄkũ doodo, Musa fã Fili'auna aɛ. 
Eé da Igipiti bùsula píngi lán lutɛ̃ bà, eé ká gbɛ̃nteenↄn kↄ̃n nↄ̀bↄnↄ bↄ̀gĩi ũ gu píngia. 
Ben aↄ̃ mↄ̀dakpɛ túbu sɛ̀ɛ aↄ̃ gàao Fili'auna kiia. Kɛ̀ Musa túbu pì fã̀ musu, ben à kà gbɛ̃nteenↄn kↄ̃n nↄ̀bↄnↄ bↄ̀gĩi ũ. 
Ɛ̃zɛ̃deenↄↄ e fↄ̃ wà gàa Musa kiiaro bↄ̀gĩi pìnↄ yãnzi, zaakɛ à dàńla kↄ̃n Igipitinↄ ń píngi. 
Ben Dii Fili'auna kù kɛ̀ gbãa lán à ò Musanɛ nà, ben à gì ń yã mazi. 
Dii bè Musanɛ: Ǹ fɛɛ kↄngↄ idɛ'idɛ ǹ gá ǹ Fili'auna le, ǹ onɛ mamↄma Dii Eberunↄ Luda ma bè à ma gbɛ̃nↄ gbarɛ aↄ̃ gá dↄnzi kɛmɛ. 
Tia sa mɛ́ yã pãsĩ píngi daàla kↄ̃n a ìbanↄ kↄ̃n à gbɛ̃nↄ, lɛ àgↄ̃ dↄ̃ kɛ̀ anduna guu píngi gbɛ̃kee dɛ lán ma bàro. 
Zaakɛ tó ma ↄ tↄ̃̀ḿma ma gagyãa kàńgu yã, lɛ àpi kↄ̃n a gbɛ̃nↄ yã̀a anduna guu. 
Ma à kà kpatan lɛ mà a gbãaa ↄdↄanɛ, wà ma tↄ́ kpá anduna guu píngi. 
Lán èe a zĩnda sɛɛ lezĩ dɛ ma gbɛ̃nↄla nà ai tia, èe ń gbarɛro, 
zia mↄndaa'i mɛ́ tó lougbɛ pãsĩ ma maamaa, lougbɛ kɛ̀ a taka e ma Igipiti zikiro zaa lán wà à kàɛ nà ai mↄna gbã̀a. 
Ǹ onɛ à gbɛ̃nↄ zĩ aↄ̃ à pↄ́kãdeenↄ kↄ̃n pↄ́ kɛ̀ à vĩ buraanↄ sɛ́ɛ wà káka kpɛ́n píngi. Gbɛ̃nteenↄ kↄ̃n pↄ́ kɛ̀ aↄ̃ↄ kú bàazinↄ, tó wèe gɛ̃ńyo kpɛ́nlo, lougbɛ é maḿma aↄ̃é gagamɛ. 
Fili'auna ìba kenↄ vĩa kɛ̀ Dii yãnɛ, aↄ̃ ń zĩkɛrinↄ kↄ̃n ń pↄ́kãdeenↄ kàka kpɛ́n. 
Mↄde gbɛ̃ kɛ̀ aↄ̃ↄe Dii yã daroonↄ ń zĩkɛrinↄ kↄ̃n ń pↄ́kãdeenↄ tò bàazi. 
Ben Dii bè Musanɛ: Ǹ ↄ sɛ́ musu, lougbɛ é ma gbɛ̃nteenↄ kↄ̃n pↄ́kãdeenↄ kↄ̃n bura pↄ́nↄa Igipiti bùsu gu píngia. 
Kɛ̀ Musa a gò dↄ̀ musu, Dii tò lou e pũtãa èe maa kↄ̃n gbɛ̀o èe pii, ben laa e pɛɛɛ tↄↄtɛa. Dii tò lougbɛ mà Igipitinↄla. 
Lougbɛ e maa, lou e pii. Lougbɛ pì pãsĩ. Zaa lán Igipiti bùsu kuu nà, lou beee taka e ma zikiro. 
Lougbɛ pì pↄ́ kɛ̀ kú bàazi Igipiti bùsu guunↄ ásaru kɛ̀ píngi, gbɛ̃nteenↄ kↄ̃n pↄ́kãdeenↄ kↄ̃n bura pↄ́nↄ píngi. À sɛ̃̀tɛ línↄ ɛ̀'ɛ píngi. 
Gosɛ̃ bùsu guu kɛ̀ Isarailinↄↄ kúnn lougbɛ pì e kánlo ado. 
Fili'auna Musa kↄ̃n Arunao sìsi à bèńnɛ: Tia sa ma durun kɛ̀. Dii yã bé à nna, mapi kↄ̃n ma gbɛ̃nↄ taarideenↄn wa ũ. 
À agbaa kpánɛ. Lapatana kↄ̃n lougbɛ kɛ̀kiio mↄ̀ lɛ. Mɛ́ a gbarɛ sa, mɛ́ gíare dↄro. 
Musa bènɛ: Tó ma bↄ wɛ́tɛ kpɛɛ, mɛ́ ma ↄↄnↄ dↄ Dii kúkiia, lapatana é zɛ, lougbɛ é yãa, lɛ ǹgↄ̃ dↄ̃ kɛ̀ tↄↄtɛ nɛ́ Dii pↄ́mɛ. 
Mↄde má dↄ̃ kɛ̀ mpi kↄ̃n n ìbanↄ, ée vĩa kɛɛ Dii Ludanɛro ai tia. 
Nagã kↄ̃n gbadoo yàka, zaakɛ nagãa gĩakɛ à pìa, gbado mↄree bↄ̀. 
Ése kↄ̃n weaao e yakaro kɛ̀ aↄ̃è ma zãa yãnzi. 
Musa bↄ̀ Fili'auna kiia à gàa wɛ́tɛ kpɛɛ à a ↄↄnↄ dↄ̀ Dii kúkiia, ben lapatana kↄ̃n lougbɛo zɛ̀, lou e ma dↄro. 
Kɛ̀ Fili'auna è lou kↄ̃n lougbɛo kↄ̃n lapatanao zɛ̀, ben à kpɛ́ èe durun kɛɛ, à swã kpɛ́ gbãa, àpi kↄ̃n a ìbanↄ. 
À kù kpɛ́ gbãa à gì Isarailinↄ gbarɛzi lán Ludaa dà Musanɛ à ònɛ nà.