NARONA.
22.
Isarailinↄ dà zɛ́n, ben aↄ̃ bùra kàɛ Mↄabunↄ bùsu sɛ̃̀n Yoda baa kãa kɛ̀ aɛ dↄ Yɛrikoa kpa. 
Zipo nɛ́ Balaki Mↄabunↄ kína è lán Isarailinↄↄ kɛ̀ Amↄrinↄnɛ nà, 
ben swɛ̃̀ kɛ̃̀ Mↄabunↄn, vĩa ń kũ Isarailinↄ parikɛɛ yãnzi. 
Ben Mↄabunↄ bè Midiã gbɛ̃nsinↄnɛ: Parii kɛ̀kii é pↄ́ kɛ̀ ligawaziinↄ ble píngi lán zù è sɛ̃̀ ble nà. 
Ben Balaki gbɛ̃nↄ zĩ̀ Bɛↄ nɛ́ Balamua ai Peto, Yuflati saɛ à bɛ bùsun. À bèńnɛ aↄ̃ à sísi à mↄ́ aↄ̃ benɛ: Gbɛ̃kenↄ bↄ̀ Igipiti aↄ̃ dàgula aↄ̃ↄ káɛ ma saɛ. 
N yã nna! Ǹ mↄ́ ǹ ń kámɛ, zaakɛ aↄ̃ gbãaa dɛmala. Wègↄ̃ dↄ̃ro ke mɛ́ e mà zĩ̀ bleḿma mà pɛ́ḿma bùsu kɛ̀n gwɛɛ. Má dↄ̃ kɛ̀ gbɛ̃ kɛ̀ n sa maaa ònɛ égↄ̃ dɛ aubarikadee ũmɛ. Gbɛ̃ kɛ̀ sↄ̃ n sa zaaa ònɛ, eégↄ̃ dɛ kana pↄ́ ũmɛ. 
Mↄabu kↄ̃n Midiã gbɛ̃nsinↄ dà zɛ́n, aↄ̃ↄ màsokɛna gbaa kɛ̀ aↄ̃é da Balamunɛ kũna. Kɛ̀ aↄ̃ kà à kiia, aↄ̃ yã kɛ̀ Balaki ń zĩo ònɛ. 
À bèńnɛ: À i kɛ̀, mɛ́ yã kɛ̀ Dii é omɛɛ oare. Ben Mↄabu kínɛ pìnↄ ì Balamu bɛ. 
Ben Luda bↄ̀ à mↄ̀ Balamuzi à à là à bè: Dénↄn gbɛ̃ kɛ̀ aↄ̃ↄ kúnyo kɛ̀kiinↄ ũu? 
À wèàla à bè: Zipo nɛ́ Balaki, Mↄabunↄ kína bé à ń zĩma. Aↄ̃ bè 
gbɛ̃ kenↄ bↄ̀ Igipiti aↄ̃ dàgula. Ben à bè mà mↄ́ mà ń káare lɛ à e à zĩ̀ bleḿma à pɛ́ḿma. 
Ben Luda bènɛ: Ǹton tɛ́ńziro. Ǹton sa zaaa ońnɛro, zaakɛ ma aubarika dàńgu kↄ̀. 
Kɛ̀ Balamu fɛ̀ɛ kↄngↄ, à bè Balaki kínɛnↄnɛ: À tá a bùsun, zaakɛ Dii gìmɛ mà tɛ́azi. 
Ben Mↄabu kínɛ pìnↄ fɛ̀ɛ wà tà Balaki kiia aↄ̃ bè: Balamu gì mↄ́waozi. 
Balaki ɛ̀ara à kínɛ pãndenↄ zĩ̀ dↄ, aↄ̃ pari kↄ̃n ń gakuio dɛ gbɛ̃ káakunↄla. 
Kɛ̀ aↄ̃ kà Balamu kiia, aↄ̃ bè: Zipo nɛ́ Balaki bè ǹton tó pↄ́ke kpánnɛ kↄ̃n mↄna a kiiaoro, 
zaakɛ eé gbaa kɛnnɛ maamaa. Pↄ́ kɛ̀ ń ònɛ píngi é kɛ. N yã nna! Ǹ mↄ́ ǹ gbɛ̃ pìnↄ kámɛ. 
Ben Balamu bè Balaki zĩ̀ri pìnↄnɛ: Baa tó Balaki kondogi kↄ̃n vura kɛ̀ kú a bɛɛo kpàma píngi, mɛ́ fↄ̃ mà bↄ Dii ma Luda yã kpɛɛro, baa féte. 
À i kɛ̀ gwãavĩa lán gbɛ̃ káakunↄↄ kɛ̀ nà ai mà ma dↄ yã kɛ̀ Dii é kaaramɛ. 
Luda bↄ̀ à mↄ̀zi gwãavĩ à bènɛ: Zaakɛ gbɛ̃ kɛ̀nↄ mↄ̀ n sísi, ǹ fɛɛ ǹ gáńyo, mↄde yã kɛ̀ mɛ́ oon ǹ kɛ. 
Balamu fɛ̀ɛ kↄngↄ à gàari yì a zaakinɛ, ben à gàa kↄ̃n Mↄabu kínɛ pìnↄo. 
Luda pↄ fɛ̃̀ à gana yãnzi, ben Dii Malaika gàa à zɛ à zɛ́ zↄ̃̀nɛ. Balamu di a zaaki kpɛɛ, à zĩkɛri gↄ̃ↄn plaaanↄn tɛ́o. 
Kɛ̀ zaaki pì è Dii Malaika zɛna zɛ́ guu à fɛ̃ɛdaa wòto à kũna, ben à lìɛ sɛ̃̀n. Balamu à lɛ̀, ben à ɛ̀ara à dà zɛ́n. 
Dii Malaika gàa à zɛ̀ zɛ́ wɛ́wɛn geepi líkpɛ kɛ̀ gbɛ̀ kara ligazinↄ dagura. 
Kɛ̀ zaaki pì Dii Malaika è, à nà gũ̀a à Balamu gbá lↄ̀a. Ben Balamu ɛ̀ara à à lɛ̀ dↄ. 
Dii Malaika ɛ̀ara à gàa aɛ dↄ à zɛ̀ gu kpaatogoo kɛ̀ liɛkii vĩroon. 
Kɛ̀ zaaki pì Dii Malaika pì è, à kùɛ kↄ̃n Balamuo. Ben Balamu pↄ fɛ̃̀ à à lɛ̀ gòo. 
Ben Dii zaaki pì gbà lɛ́ à yã ò Balamunɛ à bè: Bↄ́n má kɛ̀nnɛ n ma lɛ ai gɛ̃̀n aagↄ̃ↄ? 
Balamu wèàla à bè: Kɛ̀ n yↄ̃nkↄyã kɛ̀mɛ yãnzimɛ. Tó má fɛ̃ɛ kũna, lɛ ma n dɛ gↄ̃ↄ. 
Ben zaaki pì bènɛ: N zaaki kɛ̀ nɛɛ̀gↄ̃ diia gurↄ sãnda píngia mↄna gbã̀an ma ũroo? Má kɛ̀nnɛ lɛ zikiↄ́? À bè: Auo. 
Ben Dii Balamu wɛ́ɛ kɛ̃̀nɛ, à à Malaika è zɛna zɛ́n à fɛ̃ɛdaa wòto à kũna. Ben à kùɛ à mì pɛ̀ɛ. 
Dii Malaika à là à bè: Bↄ́yãnzin n n zaaki lɛ̀ ai gɛ̃̀n aagↄ̃zi? Ma mↄ zɛ́ zↄ̃nnɛmɛ, zaakɛ n wãmɛ. 
Kɛ̀ zaaki pì ma e, ben à lìɛmɛ ai gɛ̃̀n aagↄ̃. Tó èe liɛmɛ yãro, lɛ ma n dɛ ma à tò. 
Balamu bè Dii Malaika pìnɛ: Ma durun kɛ̀, zaakɛ má dↄ̃ kɛ̀ n zɛ́ zↄ̃̀mɛro. Zaakɛ ma gana kɛ̀nnɛ zaa, mɛ́ ɛara mà tá. 
Ben Dii Malaika bè Balamunɛ: Ǹ gá kↄ̃n gbɛ̃ pìnↄ, yã kɛ̀ mɛ́ dannɛɛn ǹ o. Ben Balamu gàa kↄ̃n Balaki kínɛ pìnↄo. 
Kɛ̀ Balaki mà Balamu e mↄↄ, ben à gàa à dààlɛ wɛ́tɛ kɛ̀ kú Anↄ baa, Mↄabunↄ bùsu lɛ́zɛkiia. 
Ben à bè Balamunɛ: Kɛ̀ ma gbɛ̃nↄ zĩ̀ wà n sísi yã, à kɛ̀ dia nɛ́ɛ mↄ́roo? Mɛ́ fↄ̃ mà gbaa kɛnnɛnloo? 
Balamu wèàla à bè: Ma mↄ sa, mↄde má yã sãnda píngi ona zɛ́ vĩro. Yã kɛ̀ Luda é damɛɛn mɛ́ o. 
Ben Balaki gàa kↄ̃n Balamuo Kiria'uzo. 
À saa ò kↄ̃n zùnↄ kↄ̃n sãanↄ à à nↄ̀bↄ kpà Balamua kↄ̃n kínɛ kɛ̀ aↄ̃ↄ kúo lɛdoonↄ. 
Kɛ̀ guu dↄ̀, à Balamu sɛ̀ à gàao Bamↄ Baali. Gwen Balamu Isarailinↄ bùra kpadoo èn.