AYUBA.
5.
Ǹ lɛ́ zú sa ǹ ma, tó gbɛ̃ke é wenla. Malaika kpareen nɛ́ aɛ dↄa? 
Íbɛtɛkpana è yↄ̃nkↄↄ dɛ, nↄ̀sɛgↄ̃aanↄ è mìsaidee kaatɛ. 
Má è yↄ̃nkↄↄ kãsãa pɛ̀ɛ, ben kãsãa pì yↄ̀ kãndo. 
À nɛ́nↄↄ zã̀ kↄ̃n aafia'ekiio, wè ń yã máɛmaɛńnɛ yãkpaɛkɛkiia, gbɛ̃ke è zɛ ń kpɛɛro. 
Nↄadɛrinↄ è à bura pↄ́nↄ ble, baa pↄ́ kɛ̀ à lɛ̀ lìgazinↄ, ímidɛrinↄ è luga à auzikizi. 
Kisia è fɛɛ bùsunlo, nawɛ̃a è bↄɛ tↄↄtɛro. 
Lán tɛ́pũtãna gana musu seka vĩro nà, lɛn gbɛ̃ kɛ̀ wà ì píngi è nawɛ̃a e lɛ. 
Tó mámbee sↄ̃, Ludan mɛ́ gbeka, mɛ́ ma yã kpáɛ à aɛzĩ. 
È yã bíta kɛ kɛ̀ weé fↄ̃ wà à gbá dↄ̃ro, weé fↄ̃ wà à yãbↄnsaɛkɛnanↄ lɛ́ dↄ̃ro. 
È tó lou ma tↄↄtɛa, è tó à í dagula sɛ̃̀tɛ. 
È gbɛ̃ busananↄ sɛ́ lezĩ, è sósobikɛrinↄ gba pↄnnaa. 
È yã kɛ̀ mↄnafikideenↄↄ e pɛɛa gboro, lɛ ń ↄzĩi tóngↄ̃ aubarika vĩro yãnzi. 
È ↄ̃ndↄ̃rinↄ kũ ń wɛ́ɛzɛ̃ɛ guu, è tó yãlɛkpɛɛ'orinↄ yãgↄ̃gↄ̃na kɛ pã. 
Guu è sia kũḿma fãantɛ̃, aↄ̃è ↄ máɛmaɛ fãantɛ̃ lán gwãavĩ bà. 
È takaasideenↄ bↄ gaa lɛ́zĩ, è pↄ́saideenↄ bↄ gbãamↄnnɛrinↄ ↄzĩ. 
Beee yãnzi gbãasaideenↄↄ tãmaa vĩ, yãzɛdesaideenↄ è yĩtɛ kyↄ̃. 
Aubarikadeen gbɛ̃ kɛ̀ Luda è à tòto kɛɛ ũ. Tó Gbãapingidee e n swã gagaa, ǹton yãbuu tãro. 
Zaakɛ è gbɛ̃ kɛ̃nna ben è à bↄ̀ gwa, è gbɛ̃ wíwi ben è à kɛ̃kↄ̃a. 
Eé n bↄ yãn gɛ̃̀n swɛɛdo, baa tó à kà gɛ̃̀n swɛɛplaa, kisia é n lero. 
Eé n sí gaaa dekaagurↄ, eé n bↄ fɛ̃ɛdaa lɛ́zĩ zĩ̀lan. 
Dii é n bↄ gbɛ̃yakarinↄ ↄzĩ, tó mↄ́nzi mↄ̀, vĩa é n kũro. 
Nɛ́ mↄ́nzi kↄ̃n nↄaao yáa dↄ, nɛ́ vĩa kɛ nↄ̀bↄ pãsĩnↄnɛro. 
Zaakɛ nɛ́gↄ̃ kuu aafia kↄ̃n gbɛ̀nↄ, nɛ́gↄ̃ nna kↄ̃n nↄ̀bↄsɛ̃tɛnↄ, 
nɛ́gↄ̃ dↄ̃ kɛ̀ n ua égↄ̃ nna, tó n gaa n kpàsan, pↄ́ke é kɛ̃sãro. 
Nɛ́gↄ̃ dↄ̃ kɛ̀ n nɛ́nↄ é kɛ pari, n boriinↄ é dagula lán sɛ̃̀ bà. 
Nɛ́ zi kũ kótokoto ǹ gbasa ǹ ga lán ése kɛ̀ mà wà kɛ̃̀ à gurↄↄa bà. 
Kɛ̀ wa yã pì asii gbèka, lɛn à dɛ lɛ. Ǹ yã pì sí nɛ́gↄ̃ dↄ̃ kɛ̀ n zĩnda yãmɛ.