AYUBA.
39.
Ń zↄ̃ nɛ́'igurↄↄ dↄ̃ↄ́? N gãsi è gurↄↄ kɛ̀ èe nɛ́ iiↄ́? 
Nɛɛ̀ ń nↄ̀ mↄↄ dↄdↄↄ́? Nɛɛ̀ ń nɛ́'igurↄↄ dↄ̃ↄ́? 
Aↄ̃è kúɛ wà nɛ́ imɛ, ben aↄ̃ nɛ́'iwãwãa è kpáɛ. 
Aↄ̃ nɛ́nↄ è gbãa kũ sɛ̃̀n aↄ̃è pɛ́ɛ, aↄ̃è gɛ̃ zɛ́la aↄ̃è su ń danↄa dↄro. 
Dé bé à tò zaakisɛ̃tɛ gↄ̃̀ a zĩndanɛ? Dé bé à à pòro à à gbàrɛɛ? 
Ma sɛ̃̀tɛ dìɛnɛ à bɛɛ ũmɛ, ma tↄↄtɛ wisidee kɛ̀nɛ à kúkii ũ. 
È pã kpá wɛ́tɛ kĩizi, è a kpàkɛri zↄka maro. 
Ègↄ̃ tɛ́ sĩ̀sĩnↄa àgↄ̃ sɛ̃̀ wɛtɛɛ, ègↄ̃ kpáɛ kɛɛ pↄ́ ísinↄzi píngi. 
Zùsɛ̃tɛ é we à zĩi kɛnnɛↄ́? Eé we à i n zùnↄ karan yↄ́? 
Nɛ́ bà dↄa lɛ à bú wínnɛↄ́? Nɛ́ gbóngo danɛ lɛ à kpasee kɛ̃nnɛↄ́? 
Nɛ́ náanɛ dↄa à gbãa bíta yãnzii? Nɛ́ n zĩi tónɛↄ́? 
Nɛ́ à náanɛ kɛ à n pↄ́wɛɛ sɛ́sɛ à suonnɛ pↄ́wɛɛgbɛ̃kiiaↄ́? 
Taataa è a dɛ̀bɛkãnↄ poro kↄ̃n pↄnnaao, mↄde eé sí lɛ́kↄ̃zi kↄ̃n tokũ dɛ̀bɛkãoro. 
È nɛ́gbere da tↄↄtɛ, è tó bùsu'ãatɛ̃ nɛ́gbere pìnↄ wã à pipi. 
À sã̀n kɛ̀ weé gà wà kɛ̀sɛ pɛ́ɛa à wíwi, kesↄ̃ nↄ̀bↄsɛ̃tɛnↄ é táa oa. 
Ègↄ̃ pãsĩ kↄ̃n a nɛ́nↄ, nɛ́gↄ̃ dↄ̃ se à zĩnda nɛ́nↄnlo, zĩ pã kɛna è kɛnɛ yãke ũro. 
Zaakɛ mɛ́ɛ à gba ↄ̃ndↄ̃ↄro, mɛ́ɛ à baka da faadeenↄ tɛ́ro. 
Mↄde tó à fɛ̀ɛ à bↄ̀ kↄ̃n bào, è gɛ̃ sↄ̃la à à dìri yáa dↄ. 
Ḿbe nɛɛ̀ tó sↄ̃ gↄ̃ gbãaa vĩↄ́? Ḿbe n sɛ̀sɛkã pɛ̀pɛnɛ à waaaↄ́? 
Ḿbe nɛɛ̀ tó àgↄ̃ vĩvĩi lán kwaa bàↄ́? À pↄ́ bↄna à yĩn kĩi gbãaa è tó vĩa ń kũ. 
È a gbá gáɛgaɛ guzurɛn, è pↄnnaa kɛ a gbãaa yãnzi, ben è gá da zĩ̀kpɛɛnↄlɛ. 
È pↄ́ kɛ̀ wè vĩa kɛnɛ yáa dↄ, swɛ̃̀ è kɛ̃nlo, è bↄru kpɛɛ fɛ̃ɛdaanɛro. 
Kà ègↄ̃ kĩi kɛɛ gbàran à musu, sári lɛ̀ɛtɛgɛ kↄ̃n sári gésedeeo è pí. 
Tó wà zĩ̀kuu pɛ̀, ègↄ̃ a zĩnda dakii dↄ̃ro, ègↄ̃ tↄↄtɛ lɛ́lɛɛ ègↄ̃ vĩvĩi ègↄ̃ kɛɛ kɛ̀ɛkɛɛ. 
Tó wà kuu pɛ̀, è pↄ́ bↄ a yĩn à be, ɛ̃hɛ̃! Ègↄ̃ zĩ̀ ĩa sɛ́sɛɛ zaa zã̀azã kↄ̃n gbɛ̃nsinↄ wii gbãaao kↄ̃n kuukɛnao. 
N ↄ̃ndↄ̃ↄ bé à tò blɛa è yàa pá, à a dɛ̀bɛ poro à gá sↄↄmɛtɛ kpaↄ́? 
Ḿbe ń dìɛ kúunɛ àgae vĩa zãazãa à a sà da zaa musuↄ́? 
Ègↄ̃ kú gbɛ̀ musu, gwen è in, è zↄ̃ gbɛ̀ mìsↄ̃ntɛ̃a a aafia'ekii ũ. 
Zaa gwen ègↄ̃ kpáɛ kɛɛ pↄ́bleezi, è wɛ́ɛ pá pↄ́nↄa kãaa. 
Arun à nɛ́nↄ pↄ́blee ũ, guu kɛ̀ pↄ́ gɛ̀ kún, gwen ègↄ̃ kún.