AYUBA.
40.
Ben Dii ɛ̀ara à bè Ayubanɛ: 
Mamↄma Gbãapingide, nɛ́ ma taari e ǹ ma gba làakariↄ́? Ludazaabori, ǹ yã wemala sa. 
Ben Ayuba wèàla à bè: 
Pↄ́ken ma ũro fá! Dian mɛ́ wenla nà? Séde mà ↄ kú ma lɛ́a. 
Ma yã ò gɛ̃̀n do, mɛ́ ɛara mà o dↄro, má ò gɛ̃̀n plaa se, mɛ́ yã sínla dↄro. 
Ben Dii ɛ̀ara à yã ò Ayubanɛ zàga'ĩa guu à bè: 
Ǹ fɛɛ ǹ zɛ lán nɛ́gↄ̃gbɛ̃ bà, mɛ́ n lala yãzi, nɛ́ wemala. 
Nɛ́ lá kú ma yãkɛna a zɛ́alan yↄ́? Ń yezi ǹ ma taari e lɛ n yã bↄ nnan yↄ́? 
N gã̀sã gbãaa kà ma pↄ́ ũↄ́? N kòto é fↄ̃ à guu nigã lán ma pↄ́ bàↄ́? 
Ǹ bítakɛ kↄ̃n kíkɛɛo da pↄ́kãsã maaanↄ ũ, ǹ gakui kↄ̃n bɛ̀ɛo da utadaa ũ. 
Ǹ n pↄfɛ̃ bↄbↄḿma, ǹ ĩadãrinↄ gwa kↄ̃n wɛ́ɛ zaaao ǹ wí daḿma. 
Ǹ ĩadãrinↄ gwa kↄ̃n wɛ́ɛ zaaao ǹ ń pãɛ, ǹ ń dúgu zↄ̃ guu kɛ̀ aↄ̃ↄ kún, 
ǹ ń ká tú ń píngi, ǹ ń yiyi ǹ ń ká gɛ̀wãan, 
mɛ́ gbasa mà n sáabu kpá, kɛ̀ n zĩ̀ blè kↄ̃n n gã̀sã gbãaao yãnzi. 
Ǹ bↄrɛ gwa, kɛ̀ ma à kɛ̀ lán ma n kɛ nà. È sɛ̃̀ ble lán zù bàmɛ. 
À gbãaa kú à wógbaamɛ, à yɛ̃̀ɛ kú à gbɛɛ báasiamɛ. 
À vlãa porona lán sida lí bà, à gbáda tĩi dɛ lán bàtãna bà. 
À wánↄↄ gbãa lán mↄ̀gotɛ̃ bà, à gbánↄↄ dɛ lán mↄ̀ gò bà. 
À bíta bé à dɛ pↄ́ bɛ̃ɛ kɛ̀ má kɛ̀nↄla píngi, à Kɛ̀ri ado bé eé à fↄ̃. 
Sĩ̀sĩnↄ musun è pↄ́ blen, gwen nↄ̀bↄsɛ̃tɛnↄ è kↄ̃kↄ̃ on ń píngi. 
È daɛ lɛ̀'itɛ gbáru, ègↄ̃ sↄtↄↄ vↄ̃n dã̀dã guu. 
Lɛ̀'itɛ ↄra è daàla, swagbaranↄ è ligazi. 
Baa tó ísↄ̃ e vĩvĩi, è bídi kɛro, tó Yoda ísↄ̃pɛɛna e à lɛ́ paa, à làakari ègↄ̃ kpaɛnamɛ. 
Weé fↄ̃ wà à wɛ́ɛ wíwi wà à kũↄ́? Weé fↄ̃ wà ↄ̃ndↄ̃ↄ daɛzi wà à yĩ fↄ̃ↄ́?