AYUBA.
41.
Nɛ́ fↄ̃ ǹ kùkuku kũ kↄ̃n daburuo ǹ gáɛ ǹ bↄoↄ́? Nɛ́ fↄ̃ ǹ bà dↄ à nɛ́nɛaↄ́? 
Nɛ́ fↄ̃ ǹ bà ká à yĩn-ↄ́? Nɛ́ fↄ̃ ǹ à lɛ́tãnka fↄ̃ kↄ̃n kúraoↄ́? 
Eé agbaa kpákpannɛ ǹ a gbarɛↄ́? Eé bennɛ ǹ sùu kɛↄ́? 
Eé wennɛ ǹ a sɛ́ n zↄ̀ ũ ai a wɛ̃̀ndi lɛ́n yↄ́? 
Nɛ́ à dato lán wè bãa dato nàↄ́? Nɛ́ bà dↄa ǹ kpá n nɛ́nↄgbɛ̃nↄaↄ́? 
Sↄrↄkↄnↄ é kùkuku pì tↄkɛḿmaↄ́? Aↄ̃é à líli latarinↄnɛↄ́? 
Nɛ́ fↄ̃ ǹ à pápa kↄ̃n sakao ǹ à báa fↄ̃ↄ́? Nɛ́ fↄ̃ ǹ à mì kɛ gyágya kↄ̃n sárioↄ́? 
Ǹ wɛtɛ ǹ ↄ kɛa ǹ gwa! Ɔsii pì yã é sãnguro, nɛ́ si ǹ à taka kɛ dↄro. 
Tó nɛ́ɛ daa nɛ́ à fↄ̃, nɛ́ɛ n zĩnda kɛkɛɛmɛ, tó n wɛ́ɛ sìàlɛ, n mɛ̀ è ganzimɛ. 
Zaakɛ gbɛ̃ke kùgbãaa e ká à à go a gbɛ̀nlo, dé bé eé fↄ̃ à zɛ ma aɛ sↄ̃ↄ? 
Dé fĩa bé à dↄma, kɛ̀ mɛ́ bonɛ? Pↄ́ kɛ̀ kú anduna guu píngi nɛ́ ma pↄ́mɛ. 
Mɛ́ gí kùkuku pì gbánↄ yã oziro ke à gↄ̃sagbãakɛɛ ke à maakɛɛ. 
Dé bé eé fↄ̃ à à tɛ̀ɛ gogoo? Dé bé eé we à aizi kánɛ? 
Dé bé eé we à à lɛ́ wɛ̃kↄ̃a? À swaa kà à gbɛ̃ naasi kũ. 
À tɛ̀ɛ dɛ lán sɛngbangonↄ bà à kpɛɛa, à didikↄ̃ana foo sai dↄ̀rↄdↄrↄ. 
À tɛ̀ɛ pìnↄ nana kↄ̃amɛ, baa ĩa è gɛ̃kii ero. 
Aↄ̃ pɛ́pɛkↄ̃rɛna gíngin, aↄ̃é sí gokↄ̃aro. 
Tó à yĩ sã̀, guu è pumɛ, à wɛ́ɛ dɛ lán ↄfãntɛ̃ bↄɛna kↄngↄ bà. 
Tɛ́nɛnɛ è bↄ à lɛ́n, tɛ́pũtãna è bↄn dↄ. 
Tɛ́sukpɛ ègↄ̃ bↄɛ à yĩn lán í kɛ̀ wà dì tɛ́a èe pipii puusu bà. 
À lɛ́'ĩa è tó sĩsĩi tɛ́ sɛ́, tɛ́nɛnɛ è bↄ à lɛ́n. 
À gbãaa kú à waaamɛ, gbɛ̃ kɛ̀ bↄ̀a mɛ̀ è kɛ kpã̀m. 
À báasi ègↄ̃ sↄ̃sↄ̃kↄ̃ana gíngin, à naa gbãngbãn, è nigãro. 
À kù gbãa lán gbɛ̀ bà, lán wísilↄgbɛ daa bà. 
Tó à fɛ̀ɛ, swɛ̃̀ è kɛ̃ gↄ̃sagbãaanↄn, aↄ̃è kↄ̃ kɛ̃guu wà kora gákiizi. 
Fɛ̃ɛdaa kɛ̀ wà à lɛ̀o píngi è bↄaro ke sári ke kà ke saka. 
È mↄ̀si gwa lán kàba bàmɛ, mↄ̀gotɛ̃ ègↄ̃ dɛnɛ lán lí mùna bàmɛ. 
È bàa lɛ́ kànɛro, gbɛ̀mba gbɛ̀ ègↄ̃ dɛnɛ lán ése ũkã bàmɛ. 
Ègↄ̃ gò gwaa lán sɛ̃̀ kori bàmɛ, sári kĩi ègↄ̃ dɛnɛ yáadↄziyã ũmɛ. 
À gbɛɛ tɛ̀ɛ dɛ lán takaso bà, à gbɛ̀ ègↄ̃ tɛ́ bↄtↄngan lán zùswaaro guwibↄ bà. 
È í ya a lↄ̀n lán í kɛ̀ èe pipii oroon bà, è ísiaa dɛ lán nↄ́sidɛna bà. 
Í kutuwina ègↄ̃ tɛ́ à kpɛɛ, ísiaa pì è ya à kpɛɛ púu. 
À sáa kú anduna guuro, ma pↄ́kɛnanↄ tɛ́ àmbe à vĩa vĩro. 
È nↄ̀bↄ kɛ̀ aↄ̃è ń zĩnda diɛ bítanↄ da pↄ́ke ũro, àmbe nↄ̀bↄ kɛ̀ aↄ̃ dìɛ wà kànↄ kína ũ.