SAAMUNƆ.
5.
Dauda lɛ̀. Wè sí kↄ̃n kurepɛnaomɛ. Ǹ swã kpá ma yãzi, Dii, ǹ làakari dↄ ma m̀bonaa. 
Ma Kína, ǹ ma wiilɛna ma, ma Luda, mɛ́ɛ wɛ́ɛ kɛɛmma. 
Dii, nɛɛ̀ ma yã'ona ma gudↄnao, mɛɛ̀ ma yãnↄ dↄdↄnnɛ kↄngↄ, ma wɛ́ɛ ègↄ̃ dↄnzi. 
N Luda n tɛ̃̀n à zaaa ũ, nɛɛ̀gↄ̃ gbɛ̃ zaaao lɛdoro. 
Ĩadãri è e à zɛ n aɛzĩro, n za yãzaakɛrinↄn ń píngi. 
Dii, nɛɛ̀ ɛgɛdeenↄ mì dɛ, ń ye gbɛ̃dɛrinↄ kↄ̃n gbɛ̃blerinↄ kãziro. 
Mapi sↄ̃, mɛ́ gɛ̃ n ua n gbɛ̃kɛ bíta yãnzi, mɛ́ kúɛ mà aɛ dↄ n kpɛ́a mà mì siɛnnɛ. 
Dii, ǹ ma da zɛ́a n náanɛkɛna yãnzi, ǹ zɛ́ poromɛ ma wɛdɛrinↄ yãnzi. 
Zaakɛ aↄ̃ yãke náanɛ vĩro, aↄ̃ nↄ̀sɛ dɛ lán kãkã bɛɛ bàmɛ, aↄ̃ kòto dɛ lán mira wɛ̃na bàmɛ, aↄ̃è lɛ́nnaa kásańnɛ. 
Ǹ tó yã vɛ̃ɛḿma Luda, ǹ tó yã zaaa kɛ̀ aↄ̃ↄe kpákpaanↄ wí ń musu. Ǹ pɛ́ḿma n aɛzĩ aↄ̃ taari pariinↄ yãnzi, zaakɛ aↄ̃ gì n yã mazi. 
Ǹ tó gbɛ̃ kɛ̀ aↄ̃ↄ utɛna n kiianↄ yáa dↄ, aↄ̃gↄ̃ lɛ̀ sii kↄ̃n pↄnnaao gurↄ píngi. Ǹ ↄ kú gbɛ̃ kɛ̀ aↄ̃ↄ yenziinↄla, lɛ aↄ̃ pↄnnaa kɛ n yã musu. 
Dii, nɛɛ̀ aubarika da gbɛ̃ maaanↄn, nɛɛ̀ ligańzi yenzio lán sɛngbango bà.