SAAMUNƆ.
9.
Dauda lɛ̀. Dii, mɛ́ n sáabu kpá kↄ̃n nↄ̀sɛo do, mɛ́ n yãbↄnsaɛkɛnanↄ kpàakpa kɛńnɛ. 
Mɛ́ pↄnnaa kɛ mà ĩa dã n yã musu, Luda Musude, mɛ́ n tↄ́ kpá kↄ̃n lɛ̀sinao. 
Ma ibɛɛnↄ è kpɛɛ li, aↄ̃è lɛɛ wà gaga n aɛ. 
Zaakɛ n zɛmao n yã nnaa kpàma, vɛ̃ɛna n tintia n yã gↄ̃̀gↄ̃ a zɛ́a. 
N kpãkɛ̃ boriinↄzi, n gbɛ̃ zaaanↄ kàatɛ n ń tↄ́ dɛ̀dɛ míↄmiↄ. 
N mↄ́nzi kɛ̀ è yãaroo kpà ma zangurinↄzi, n ń wɛ́tɛnↄ gbòro, aↄ̃ yã dↄ gbɛ̃ken dↄro. 
Dii è kí ble gurↄ píngi, à a kpata dìɛ yãkpaɛkɛna yãnzi. 
Eé yãkpaɛ kɛ kↄ̃n anduna gbɛ̃nↄ súusu, eé kí ble boriinↄa a zɛ́a. 
Diin utɛkii ũ gbɛ̃ kɛ̀ wèe gbãaa mↄↄńnɛnↄnɛ, à dɛńnɛ aafia'ekii ũ nawɛ̃akɛgurↄ. 
Dii, gbɛ̃ kɛ̀ aↄ̃ↄ n tↄ́ dↄ̃ↄnↄↄ n náanɛ vĩ, nɛɛ̀ n kii wɛ̀tɛrinↄ zĩnnaro. 
À lɛ̀ sí Diinɛ, èe kí blee zaa Zayↄn, à à yãkɛnanↄ kpàakpa kɛ bori pínginɛ. 
Zaakɛ è gɛ̃ɛ bo gbɛ̃dɛria, yã è sãnlo, è takaasideenↄ wiilɛna yã da. 
Dii, ǹ gwa lán ma ibɛɛnↄↄ e ĩa daama nà, ǹ ma wɛ̃nda gwa ǹ ma bↄ gaa lɛ́zĩ, 
lɛ mà n tↄ́ kpá Zayↄn bĩilɛa, mà pↄnnaa kɛ kɛ̀ n ma mì sì yãnzi. 
Boriinↄ sì wɛ̀ɛ kɛ̀ aↄ̃ↄ yↄ̃̀n, aↄ̃ gbá zù bà kɛ̀ aↄ̃ↄ kpàkpa guu. 
Wà Dii dↄ̃ kↄ̃n yãkpaɛkɛna a zɛ́ao, è tó gbɛ̃ zaaa yãkɛna wí à musu. 
Gbɛ̃ zaaanↄ è tá gɛ̀wãan, borii kɛ̀ aↄ̃è Luda yã daroo pìnↄ. 
Wɛ̃ndadeenↄ yã é sãn zikiro, takaasidee sↄ̃ wɛ́ɛdↄzina yãana vĩro. 
Ǹ fɛɛ Dii, ǹton tó gbɛ̃ntee n gã̀ fĩro, ǹ bori píngi kakↄ̃a ǹ yãkpaɛ kɛńyo. 
Dii, ǹ tó vĩa boriinↄ kũ, lɛ aↄ̃ e wà dↄ̃ kɛ̀ gbɛ̃nteenↄn ń ũ.