SAAMUNƆ.
17.
Dauda aduakɛna Dii, ǹ ma yãzɛdee ma, ǹ swã kpá ma wiipɛnazi, ǹ ma wɛ́ɛkɛna sí, zaakɛ mɛ́ɛ kɛɛ kↄ̃n mↄnafikioro. 
N kiian mɛ́ yã nnaa en, n wɛ́ɛ e yã kɛ̀ zɛ́ vĩi ee sãnsãn. 
N ma swɛ̃̀ gwà, n wɛ́ɛ tɛ́mazi gwãavĩ, n ma tàasi kɛ̀, nɛ́ɛ yãke emaro, zaakɛ ma zɛo kɛ̀ ma lɛ́ é ma kari kɛro. 
Mɛɛ̀ tɛ́ gbɛ̃ntee yãkɛnanↄziro, mɛɛ̀ gbɛ̃ pãsĩnↄ zɛ́kpaɛ sɛ́ro. 
Ma lili ò n zɛ́n súusu, mɛ́ɛ pã n yãnɛro. 
Mɛ́ɛ lɛ́ zuunzi, zaakɛ nɛ́ wemala. Luda, ǹ swã kpá ma aduakɛnazi. 
Ǹ n gbɛ̃kɛ bↄnsaɛ yã kɛmɛ, ǹ gbɛ̃ kɛ̀ aↄ̃ nànziinↄ bↄ ń ibɛɛnↄ ↄzĩ. 
Ǹ làakari dↄma lán n wɛ́ɛnɛ bà, ǹ ma sↄtↄ n ↄru. 
Ǹ ma sí gbɛ̃ zaaa kɛ̀ aↄ̃è ĩa damaanↄa, ma ibɛɛ kɛ̀ aↄ̃ↄ liganamazii pìnↄ. 
Aↄ̃è gbɛ̃ke wɛ́ɛ gwaro, aↄ̃ lɛ́ è ĩadãyã o. 
Aↄ̃ pɛ̀ɛma wà lìgamazi, aↄ̃ wɛ́ɛ bìima lɛ wà e wà ma pãɛ tↄↄtɛ. 
Aↄ̃ↄ yezi wà ma kɛ gyáigyai lán músu nↄadɛri è kɛ nà, lán músu kɛ̀ naɛna gusaɛ bà. 
Dii, ǹ fɛɛ ǹ dańlɛ ǹ ń nɛ, ǹ ma sí gbɛ̃ zaaanↄa kↄ̃n n fɛ̃ɛdaao. 
Ǹ ma bↄ ń ↄzĩ kↄ̃n n gbãaao. Aↄ̃ baka kú anduna kɛ̀kii guu, aↄ̃ auziki ègↄ̃ dińzi, aↄ̃ nɛ́nↄ è kã, aↄ̃è pↄ́ kɛ̀ dìńzinↄ káɛ ń nɛ́nↄnɛ. 
Mapi sↄ̃, mɛ́ wɛ́ɛ sinlɛ ma nↄ̀sɛ maaa yãnzi, tó ma n e ma fɛɛgurↄ, beee é mↄ́ma.