SAAMUNƆ.
30.
Lɛ̀ kɛ̀ Dauda dà Luda ua kyakɛna yã musu. Mɛ́ n tↄ́ sɛ́ lezĩ Dii, zaakɛ n ma kaara, nɛ́ɛ tó ma ibɛɛnↄ ma nɛro. 
Dii ma Luda, ma wii pɛ̀nzi, ben n ma gba aafia. 
Dii, n ma si miraa, nɛ́ɛ tó ma si gɛ̀wãanlo. 
Dii gbɛ̃nↄ, à à tↄ́ kpá, à à tↄ́ kɛ̀ kú adona sáabu kpá. 
Zaakɛ à pↄfɛ̃na è gì kɛro, à aubarika bé ègↄ̃ kuu ai gbɛ̃ wɛ̃̀ndi lɛ́n. Ɔ́ↄdↄna ègↄ̃ kuu gwãavĩ, ben guu è dↄ kↄ̃n pↄnnaao. 
Kɛ̀ má kú nnamana guu ma bè: Mɛ́ kpágula zikiro. 
Dii, kɛ̀ n aubarika dàmagu, n ma zɛ gíngin lán kpiii bà. Mↄde kɛ̀ n mìkpɛɛ zùmɛ, ma gↄ̃ bídi guu. 
N Dii, mbe ma n sisi, ma kúɛ kɛ̀ ma diinɛ ma bè: 
Bↄ́ àren ma gaa vĩi ke ma sina gɛ̀wãan? Ma mira é n tↄ́ kpán yↄ́? Eé n náanɛ kpàakpa kɛn yↄ́? 
Ǹ ma yã ma Dii ǹ ma wɛ̃nda gwa, Dii, ǹgↄ̃ dɛ ma dↄnlɛri ũ. 
N ma ↄ́ↄdↄna lìɛ ↄ̃wãna ũ, n ma pↄsia utanↄ pìtima, n pↄnnaa dàmɛ pↄ́kãsãa ũ. 
Mɛ́gↄ̃ yĩtɛnaro, mɛ́gↄ̃ n tↄ́ kpaamɛ, Dii ma Luda, mɛ́gↄ̃ n sáabu kpaa gurↄ píngi.