SAAMUNƆ.
32.
Dauda lɛ̀. Aubarikadeen gbɛ̃ kɛ̀ Luda pↄ́ kù à taarinↄla à à durunnↄ kɛ̃̀nɛ ũ. 
Aubarikadeen gbɛ̃ kɛ̀ Dii è à durun yã daroo ũ, bensↄ̃ mↄnafiki kú à nↄ̀sɛ guuro. 
Kɛ̀ ma yĩtɛ kↄ̃n ma durun-o, ma yãyã, ma wiii ègↄ̃ dↄ zaa kↄngↄ ai uusiɛ. 
N ↄ tↄ̃̀ma fãantɛ̃ kↄ̃n gwãavĩo, ma gbãaa yã̀a lán guwãagurↄ ↄfãntɛ̃ bé à ma lɛɛ bà. 
Ben ma wennɛ ma durunzi, mɛ́ɛ ma yã zaaa utɛnnɛ dↄro. Ma bè, mɛ́ ma taarinↄ o Diinɛ, ben à ma durun kɛ̃̀mɛ. 
Beee yãnzi n náanɛkɛri wɛ́ɛ kɛmma a gurↄↄazi, tó yã zĩ'ũu e mↄↄ, eé à lero. 
Ma utɛkiin n ũ, nɛɛ̀ ma bↄ wɛ́ɛtãmma guu, nɛɛ̀ ligamazi ǹ ma mì sí. 
Mɛ́ yã dannɛ mà n da zɛ́ kɛ̀ dɛ ǹ sɛ́a, mɛ́ lɛ́ damma, ma wɛ́ɛ gↄ̃ tɛ́nzi. 
Ǹtongↄ̃ kuu laasuu sai lán sↄ̃ ke bãagãsↄ̃ bàro, tó nɛ́ɛ aizi káńnɛ kↄ̃n a bàoro, aↄ̃è da n dↄ̀rↄaro. 
Yã'ↄ̃amma è da gbɛ̃ zaaanↄla, Dii yenzi è liga à náanɛkɛrinↄzi. 
Gbɛ̃ maaanↄ, à pↄnnaa kɛ Dii yãnzi, nↄ̀sɛpuradeenↄ, à guda kɛ à yáa dↄ.