SAAMUNƆ.
37.
Dauda lɛ̀. Ǹton tó gbɛ̃ zaaanↄ yã n kũ gbãaro, ǹton zaakɛrinↄ gwena ni dɛro, 
zaakɛ aↄ̃é kori kũ wà gaga tia lán sɛ̃̀ bàmɛ, aↄ̃ maakɛɛ é yãa lán sɛ̃̀la ísi bà. 
Ǹ Dii náanɛ kɛ, ǹgↄ̃ yã maaa kɛɛ, ǹgↄ̃ kú bùsu kɛ̀n, ǹgↄ̃ nnaa maa. 
Ǹ tó n pↄↄ gↄ̃ nna Diia, eé pↄ́ kɛ̀ n nↄ̀sɛ yezi kpámma. 
Ǹ zɛ kↄ̃n Diio ǹ à náanɛ kɛ, eé yã kɛ̀nↄ kɛnnɛ. 
Eé tó yã bↄnyo nna lán gudↄna bà, eé tó ǹ bↄ maa lán fãantɛ̃ gupuraa bà. 
Ǹ lɛ́ yĩtɛ Dii aɛ ǹ sↄ̃kpazi, ǹton tó auzikide yã n kũ gbãa gurↄↄ kɛ̀ à bↄ̀ kↄ̃n a wɛ́ɛzɛ̃ zaaaoro. 
Ǹ pↄfɛ̃ tó ǹ mì kɛ̃ pɛ̃tɛ̃a. Ǹton tó yã beeenↄ n kũ gbãaro, è mↄ́ kↄ̃n yãzaakɛnaomɛ. 
Zaakɛ gbɛ̃ zaaanↄ é kaatɛ, gbɛ̃ kɛ̀ aↄ̃ wɛ́ɛ dↄ Diizinↄ bé wégↄ̃ bùsu vĩ. 
À gↄ̃̀ féte kɛ̀ gbɛ̃ zaaanↄ égↄ̃ kuu dↄro, baa tó n ń wɛ́tɛ, nɛ́ ń ero. 
Zĩndabusarinↄ bé wégↄ̃ bùsu vĩ, aↄ̃égↄ̃ pↄnnaa kɛɛ kↄ̃n aafia bítao. 
Gbɛ̃ zaaa è à zaaa kpákpa gbɛ̃ maaazi, è fɛ̃zi. 
Mↄde Dii ègↄ̃ à yáa dↄↄ, zaakɛ à dↄ̃ kɛ̀ à gurↄↄ é papa. 
Gbɛ̃ zaaanↄ è fɛ̃ɛdaa woto, aↄ̃è ń kà kpá sála, lɛ wà e wà takaasideenↄ kↄ̃n wɛ̃ndadeenↄ dɛdɛo, aↄ̃é gbɛ̃ kɛ̀ ń yãkɛna maaanↄ kaatɛ. 
Aↄ̃ zĩnda fɛ̃ɛdaa é ń zↄ̃ ń swɛ̃̀n, weé ń sánↄ ɛ́'ɛńnɛ. 
Pↄ́ féte kɛ̀ gbɛ̃ maaa vĩi dɛ gbɛ̃ zaa pariinↄ auzikila, 
zaakɛ gbɛ̃ zaaanↄ gbãaa é mì dɛ, mↄde Diin gbɛ̃ maaanↄ kũna ũ. 
Dii taarisaideenↄ yã dↄ̃, aↄ̃ baka ègↄ̃ dɛ ń pↄ́ ũ gurↄ píngi. 
Wí é ń kũ yã pãsĩ gurↄↄ zĩro, baa tó dekaa kà, aↄ̃égↄ̃ kãna. 
Gbɛ̃ zaaanↄ sↄ̃ é kaatɛ, Dii ibɛɛnↄ é yãa lán sɛ̃̀la bↄ̀rↄ nà, aↄ̃é gɛ̃tɛ lán tɛ́sukpɛ bà. 
Gbɛ̃ zaaa è pↄ́ sɛ̃kãḿma à à fĩa boro, gbɛ̃ maaa sↄ̃ è gba da maamaa. 
Gbɛ̃ kɛ̀ Dii aubarika dàńgunↄ bé wégↄ̃ bùsu vĩ, gbɛ̃ kɛ̀ à lɛ́ kɛ̀ńnɛnↄ sↄ̃ é kaatɛ. 
Dii è gbɛ̃ da zɛ́ kɛ̀ dɛ à sɛ́a, à pↄↄ ègↄ̃ nna à kuunaa. 
Baa tó à gɛ̃̀n sì, eé lɛ́ɛro, kɛ̀ Dii à kũna yãnzi. 
Zaa ma gↄ̃kparɛkɛgurↄ ai ma gaa ma zi kũ̀o la, mɛ́ɛ e Luda gbɛ̃ maaa zĩ̀nna zikiro, mɛ́ɛ e à nɛ́nↄↄ e baa kɛɛro. 
Ègↄ̃ gba daa gurↄ píngi ègↄ̃ pↄ́ sɛ̃kãańnɛmɛ, à nɛ́nↄ égↄ̃ aubarika vĩ. 
Ǹ kpɛɛ li yã zaaanɛ ǹgↄ̃ à maaa kɛɛ, nɛ́gↄ̃ kú bùsu kɛ̀n gurↄ píngi. 
Zaakɛ Dii ye yãzɛdeezi, eé a náanɛkɛrinↄ zĩnnaro. Aↄ̃égↄ̃ kuu aafia gurↄ píngi, gbɛ̃ zaaanↄ sↄ̃ é kaatɛ. 
Gbɛ̃ maaanↄ bé wégↄ̃ bùsu vĩ, aↄ̃égↄ̃ kún gurↄ píngi. 
Ɔ̃ndↄ̃yã è bↄ gbɛ̃ maa lɛ́n, à lɛ́ è yãzɛdee o. 
À Luda doka kú à swɛ̃̀n, à gbá è sata pↄ́kearo. 
Gbɛ̃ zaaa è gbɛ̃ maaa kpákpa lɛ à e à à dɛ, 
mↄde Dii é à tó à ↄzĩro, eé we yãkpaɛ à nɛro. 
Ǹ sↄ̃kpa Diizi ǹgↄ̃ à yã kũna, eé n kaara lɛ ǹgↄ̃ bùsu vĩ, nɛ́ gbɛ̃ zaaanↄ kaatɛna e. 
Ma gbɛ̃ zaa gbãade ke è yã, à gbã̀ à ↄ tà lán lí kɛ̀ tↄↄtɛ kɛ̀nɛ nnaa bà. 
Kɛ̀ tá ma kpa gwe, à kú gwe dↄro, ma à wɛ̀tɛ, mɛ́ɛ à ero. 
Ǹ taarisaide yã gwa, ǹ gbɛ̃ maa yã tàasi kɛ, zaakɛ nↄ̀sɛyĩidee boriinↄ é gↄ̃ borii ũ. 
Durunkɛrinↄ sↄ̃ é kaatɛ lɛdolɛ, gbɛ̃ zaaanↄ borii é mì dɛ. 
Dii bé eé gbɛ̃ maaanↄ mì sí, eégↄ̃ dɛńnɛ utɛkii ũ nawɛ̃akɛgurↄ. 
Dii é dↄńlɛ à ń bↄ, eé ń sí gbɛ̃ zaaanↄa à ń mì sí kɛ̀ aↄ̃ nàzi yãnzi.