SAAMUNƆ.
40.
Dauda lɛ̀. Ma wɛ́ɛ dↄ̀ Diizi maamaa, ben à aɛ dↄ̀ma à ma wiipɛna mà. 
À ma bↄ kokotɛ̃wɛɛn, à ma bↄ foo guu. À ma gbá pɛ̀ɛ gbɛ̀si musu, à ma zɛ gwe gíngin. 
À lɛ̀ dufu dàmɛ ma lɛ́n, wa Luda sáabukpana pↄ́ ũ. Gbɛ̃nↄ é e pari, vĩa é ń kũ, aↄ̃é Dii náanɛ kɛ. 
Aubarikadeen gbɛ̃ kɛ̀ Dii náanɛ vĩi ũ, bensↄ̃ è aɛ dↄ ĩadãrinↄ kↄ̃n tãagbãgbãrinↄaro. 
Dii ma Luda, n yãbↄnsaɛkɛnanↄↄ pari, weé fↄ̃ wà yã kɛ̀ nɛ́ɛ pɛɛawee dↄdↄro. Tó mɛ́ɛ tↄ̃kɛ̃ɛnnɛ, à lɛ́ vĩro, mɛ́ fↄ̃ mà o píngiro. 
Ń ye sa'opↄ ke gbaaziro, ben n ma gba swã mà yã mao. Nɛ́ɛ sa'opↄ kɛ̀ wè ká tɛ́n à tɛ́ kũ ke durun agbaakpabↄ gbekaro. 
Ben ma bè: Maɛ kɛ̀, ma mↄ lán wà kɛ̃̀ takadan ma yã musu nà. 
Má ye n pↄyezi kɛmɛ, ma Luda, n doka kú ma swɛ̃̀ guu. 
Mɛ́ yãzɛdee baaru kpá pari kakↄ̃ana guu, mɛ́ ma lɛ́ nakↄ̃aro, lán ń dↄ̃ nà Dii. 
Mɛ́ɛ n yãzɛdee utɛńnɛro, ma n náanɛ kↄ̃n n mìsinao yã ò. Mɛ́ɛ gí n yenzi kↄ̃n n yãpuraao o pari kakↄ̃ana guuziro. 
Dii, ǹton gí ma wɛ̃nda gwaziro, n yenzi kↄ̃n n yãpuraao gↄ̃ ma dãkpaa. 
Zaakɛ yã zaaa kɛ̀ liganamazi lɛ́ vĩro, ma taarinↄ dàmala, mɛ́ɛ guu eero, à pari dɛ ma mìkãla, swɛ̃̀ kɛ̃̀magu. 
Dii, ǹ sùu kɛ ǹ ma mì sí, Dii, ǹ kɛ kpakpaa ǹ mↄ́ ǹ dↄmalɛ. 
Ǹ tó wí gbɛ̃ kɛ̀ aↄ̃ↄe ma wɛɛ wà ma dɛɛnↄ kũ, aↄ̃ ń mì pɛ́ɛ. Ǹ tó gbɛ̃ kɛ̀ aↄ̃ↄ yezi mà mↄ́nzi eenↄ kpɛɛ li, aↄ̃ uu yãkↄ̃tɛ. 
Gbɛ̃ kɛ̀ aↄ̃è bemɛ taalɛ taalɛɛnↄ, ǹ tó wí ń kũ aↄ̃ kɛ gìri. 
Gbɛ̃ kɛ̀ aↄ̃ↄe n kii wɛtɛɛnↄ, ǹ tó aↄ̃ pↄↄ kɛmma nna aↄ̃ yáa dↄ. Gbɛ̃ kɛ̀ aↄ̃ↄ ye n mìsinazinↄ gↄ̃ bee Dii bíta. 
Takaaside wɛ̃ndadeen ma ũ, ǹ laasuu lɛ́ ma yãzi, Dii. Ḿbe ma dↄnlɛri ũ kↄ̃n ma mìsirio, ma Luda, ǹton gì kɛro.