SAAMUNƆ.
45.
Yenzi lɛ̀ kɛ̀ Kora boriinↄↄ dà. Yã nnaa e pipii ma swɛ̃̀ guu, lán mɛ́ɛ lɛ̀ kɛ̀kii daa kínanɛ nà. Ma lɛ́ nna lán takadakɛ̃ri lákɛ̃bↄ bà. 
N maakɛɛ dɛ gbɛ̃ píngila, n lɛ́gbɛ ègↄ̃ nna, aubarika kɛ̀ Ludaa dànguu yãana vĩro. 
N zĩ̀kari pãsĩ, ǹ n fɛ̃ɛdaa sɛ́ ǹ logo n kíkɛgakui sèeda ũ. 
Ǹ di sↄ̃a ǹ gá zĩ̀ ble n gakuikɛɛ guu yãpura kↄ̃n nↄ̀sɛdooo kↄ̃n yãzɛdeeo yãnzi, ǹ yã naasideenↄ kɛ kↄ̃n n ↄplaa gbãaao. 
Kí, n kànↄ lɛ́ sↄ̃ntɛ, è gɛ̃ à n ibɛɛnↄ swɛ̃̀ zↄ̃, boriinↄ è lɛ́ɛ n gbá saɛ. 
Luda, nɛ́gↄ̃ vɛ̃ɛna kpatan gurↄ píngi, nɛ́gↄ̃ n kíkɛgo kũna yãzɛdee ũ. 
Ń ye yãmaakɛnazi, n za yãzaakɛnan. Beee yãnzi Luda, n Luda, n ka kpatan, à pↄnnaa pìsimma dɛ n gbɛ̃nↄla. 
Lí'ↄ gũ nnannaa pìsi n pↄ́kãsãanↄa, mↄrↄ'ↄ è n pↄↄ kɛ nna n kpɛ́ kɛ̀ wà kɛ̀kɛ kↄ̃n wesaswaao guu. 
Kí nɛ́nↄgbɛ̃nↄↄ kú n nↄ yenzideenↄ tɛ́, n nↄ dufu kú n ↄplaazi, à Ofi bùsu vura zãblebↄnↄ dana. 
Nɛ́nↄkparɛ, ǹ swã kpá ǹ ma! N de bɛ kↄ̃n n gbɛ̃nↄ yã tón dↄnnɛ aɛro. 
N nↄmaakɛɛ e kí mɛ̀ lugaa, ǹ mì siɛnɛ, zaakɛ n diin à ũ. 
Tayadeenↄ é mↄ́ wà gba dannɛ, auzikideenↄ é n wɛ́ɛ wɛtɛ. 
Kí nɛ́nↄkparɛ vɛ̃ɛna kpɛ́nɛ guu kↄ̃n gakuio, wà ↄzĩi kɛ̀ à pↄ́kãsãanↄa kↄ̃n vura bào. 
Wèe suuo kínɛ kↄ̃n à pↄ́kãsã wɛ̃zãdeenↄo dana. Nɛ́nↄkparɛ zɛnnɛrinↄↄ tɛ́zi, aↄ̃ↄe suuo à kiia. 
Wèe gɛ̃ɛńyo kíbɛ, wèe pↄnnaa kɛɛ kↄ̃n gudakɛnao. 
N nɛ́gↄ̃gbɛ̃nↄ é gↄ̃ n denↄ gɛ̃ɛ ũ, nɛ́ ń diɛdiɛ kínanↄ ũ anduna guu píngi. 
Mɛ́ tó n tↄ́ gↄ̃ dↄ gbɛ̃nↄn yãana sai, boriinↄ égↄ̃ n sáabu kpaa gurↄ píngi.