SAAMUNƆ.
49.
Kora boriinↄ lɛ̀. Bori píngi, à yã kɛ̀kii ma, anduna píngi, à swã kpá, 
kínanↄ kↄ̃n talakanↄ, auzikideenↄ kↄ̃n takaasideenↄ a píngi. 
Ɔ̃ndↄ̃yã kú ma lɛ́n, dↄ̃na kú ma swɛ̃̀n. 
Mɛ́ swã dↄ yáasi yãzi mà à bↄkↄ̃tɛ kɛ kↄ̃n mↄrↄlɛnao. 
Mɛ́ vĩa kɛ yã pãsĩ gurↄↄnɛro, baa tó ma zangurinↄ ligamazi. 
Aↄ̃ ń auziki náanɛ vĩ, aↄ̃è ń ↄↄdaa ĩa dã. 
Gbɛ̃ke é fↄ̃ à gí a gbɛ̃daaanɛ gaa kɛ̀ eé à sɛ́ziro, eé e à pↄ́ke kpá Ludaa à à wɛ̃̀ndi booro. 
Zaakɛ gbɛ̃ wɛ̃̀ndi bona zĩ'ũ, auziki é fↄ̃ à bo zikiro. 
Eé fↄ̃ à tó àgↄ̃ kuu gurↄ píngiro, eé fↄ̃ à gínɛ àton wɛ́ɛ si gɛ̀wãalɛro. 
Zaakɛ wà dↄ̃ kɛ̀ baa ↄ̃ndↄ̃rinↄ è ga, mìsaideenↄ kↄ̃n yↄ̃nkↄↄnↄ è kaatɛ lɛ se, aↄ̃è ń auziki tó gbɛ̃ pãndenↄnɛ. 
Baa kɛ̀ wà ń tↄ́nↄ kpà bùsunↄnɛ yã, aↄ̃ mira égↄ̃ dɛ ń bɛɛ ũmɛ gurↄ píngi, eégↄ̃ ń kúkii ũ ai ń boriia. 
Gbɛ̃ntee kↄ̃n a bɛ̀ɛkɛɛo ègↄ̃ kuu gurↄ píngiro, eé kaatɛ lán nↄ̀bↄnↄ bàmɛ. 
Mìsaideenↄ yãanan gwe, lɛn à dɛ lɛ dↄ kↄ̃n gbɛ̃ kɛ̀ aↄ̃ↄ tɛ́ ń tuubazinↄ. 
Aↄ̃é si gɛ̀wãan lán sãanↄ bà, gaa bé eégↄ̃ dɛ ń dã̀ri ũ, gbɛ̃ maaanↄ é kí bleḿma ziaa zĩ. Aↄ̃ mɛ̀nↄ é yai kũ miran, gɛ̀wãa bé eégↄ̃ dɛ ń bɛɛ ũ. 
Mↄde Luda é ma wɛ̃̀ndi sí gɛ̀wãaa à gbãakɛ kpámazi. 
Tó gbɛ̃ e kɛɛ auzikidee ũ bensↄ̃ à bɛ tↄ́ nnaa e kaara, ǹton tó à kɛnnɛ yãke ũro, 
zaakɛ eé e à pↄ́ke sɛ́ à táo a gagurↄro, à auzikinↄ é pɛ́ɛziro. 
Baa tó à a zĩnda dↄ̃̀ aubarikadee ũ a wɛ̃̀ndi gurↄ bensↄ̃ wà à sáabu kpà à nnamana yãnzi, 
eé ká a dezinↄlamɛ, eé wɛ́ɛ si gupuraalɛ ziki dↄro. 
Gbɛ̃ntee kↄ̃n a bɛ̀ɛkɛɛo, tó à wɛ́ɛ e kɛ̃ro, eé gɛ̃tɛ lán nↄ̀bↄnↄ bàmɛ.