SAAMUNƆ.
56.
Lɛ̀ kɛ̀ Dauda dà gurↄↄ kɛ̀ Filisitininↄ à kũ̀ zaa Gata. Ǹ ma wɛ̃nda gwa Luda, wèe pɛɛɛmazi, wègↄ̃ zĩ̀ kaamao wàgↄ̃ wɛ́ɛ tãama gurↄ píngi. 
Ma kpàkparinↄ ègↄ̃ pɛɛɛmazi gurↄ píngi, aↄ̃ wada yãnzin aↄ̃ↄe zĩ̀ kaamaozi. 
Tó vĩa e ma kũu, mɛ́ n náanɛ kɛ. 
Mɛ́ Luda tↄ́ kpá yã kɛ̀ à ò yãnzi, má Luda náanɛ vĩ, mɛ́ vĩa kɛro. Bↄ́n gbɛ̃ntee é fↄ̃ à kɛmɛɛ? 
Aↄ̃ègↄ̃ ma yã liɛɛ kpɛɛgãnda gurↄ píngi, aↄ̃ègↄ̃ ma kpákpaa à zaaao. 
Aↄ̃è kↄ̃ kakↄ̃amazi wà naɛmɛ, aↄ̃è ma kpákpa wàgↄ̃ yezi wà ma dɛ. 
Luda, ǹton tó aↄ̃ gbɛ̃ke bↄro, ǹ boriinↄ nɛ kↄ̃n pↄfɛ̃o. 
Ǹ ma nawɛ̃a yã da, ǹ ma wɛ́ɛ'ikwɛɛna ká n sɛ̀rɛ guu. À kú n takada guuroo? 
Tó ma Luda sìsi, ma ibɛɛnↄ é bↄru kpɛɛ, mɛ́gↄ̃ dↄ̃ kɛ̀ à yã sìmao. 
Mɛ́ Luda tↄ́ kpá yã kɛ̀ à ò yãnzi, ee, mɛ́ Dii tↄ́ kpá yã pì ona yãnzi. 
Má Luda náanɛ vĩ, mɛ́ vĩa kɛro. Bↄ́n gbɛ̃ntee é fↄ̃ à kɛmɛɛ? 
Luda, mɛ́ lù kɛ̀ má sɛ̀mmaanↄ fĩa bo, mɛ́ kɛnnakↄ̃o saa omma. 
Zaakɛ n ma si gaa lɛ́zĩ, nɛ́ɛ tó ma gɛ̃̀n sìro, lɛ màgↄ̃ táa oonyo gupuraa kɛ̀ è wɛ̃̀ndi kpáḿma guu.