SAAMUNƆ.
58.
Dauda lɛ̀. Gbãadeenↄ, eè yã o a zɛ́a sↄ̃ↄ́? Eè yãkpaɛ kɛ kↄ̃n gbɛ̃nↄo súusuↄ́? 
Eè yã zaa wàari pá a swɛ̃̀ guu, eè gbãaa mↄ gbɛ̃nↄnɛ a bùsun. 
Gbɛ̃ zaaanↄ sã̀sã zaa ń igurↄmɛ, ɛgɛdeenↄ yàka zaa ń da gbɛɛɛmmɛ. 
Aↄ̃ lɛ́gbɛ dɛ lán mlɛ̃̀ sɛwɛɛ bà, aↄ̃ↄ dɛ lán kárɛ kɛ̀ à a swã tàta bà, 
lɛ àton a kↄ̃kↄ̃'ori gaasia ↄ́ maro, lɛ mlɛ̃̀ pì tón a dabokɛri gonikɛɛ ero. 
Luda, ǹ ń swaa ɛ́'ɛńnɛ ń lɛ́n, Dii, ǹ músu pìnↄ swaa sↄ̃ntɛnↄ ɛ́'ɛńnɛ. 
Ǹ tó aↄ̃ gɛ̃ zɛ́la lán í bàalɛna bà. Tó aↄ̃ sá gà, ǹ ń kànↄ ɛ́'ɛńnɛ. 
Ǹ tó aↄ̃ kori kũ zɛ́n lán kↄntↄ lóu bà, aↄ̃gↄ̃ dɛ lán nↄ̀bↄɛnɛ kɛ̀ èe ↄfãntɛ̃ eroo bà. 
Ai yàka tɛ́ gↄ̃ oroo wã, gbɛ̃ zaaanↄ é gɛ̃ ĩa. 
Gbɛ̃ maaanↄ é pↄnnaa kɛ, zĩ kɛ̀ Luda gɛ̃ɛ bòńnɛ gbɛ̃ zaaanↄa, kɛ̀ aↄ̃ ń gbá pìpi ń aru guu. 
Gbɛ̃nↄ é be: Gbɛ̃ maaanↄ láada vĩ fá! Ludaa kuu, è yãkpaɛ kɛ anduna guu.