SAAMUNƆ.
66.
Anduna gbɛ̃ píngi, à guda dↄ Diia. 
À lɛ̀ sí à tↄ́ gakuikɛɛ musu, à à táaki lɛ́ à à tↄ́ bↄ. 
À be Ludanɛ: N yãkɛnanↄↄ naasi vĩ, n gbãa bíta è tó n ibɛɛnↄ na ń sàsaa. 
Anduna píngi è kúɛnnɛ, aↄ̃è n táaki lɛ́ wà n tↄ́ bↄ. 
À mↄ́ à Luda yãkɛnanↄ gwa, yã kɛ̀ à kɛ̀ gbɛ̃nteenↄnɛ naasi vĩ. 
À ísiaa lì gukori ũ, aↄ̃ swaa bikũ̀ kɛ̀sɛ. Wà pↄnnaa kɛ à yã musu. 
Ègↄ̃ kí blee kↄ̃n a gbãaao gurↄ píngi, à wɛ́ɛ ègↄ̃ kú boriinↄa. Swãgbãadeenↄ tón dↄkɛoro. 
Boriinↄ, à wa Luda sáabu kpá, à táakilɛna gↄ̃ kú a lɛ́n. 
À wa wɛ̃̀ndi dã̀kpawe, èe tó wa gbá sàtaro. 
Luda, zaakɛ n wa yↄ̃ n wa gwa, n wa baasa lán kondogi bà. 
N wa ka kpɛ́siaan, n aso tìisi dìwe wa kpɛɛ. 
Ń tò wà dìwa lán sↄ̃ bà, wa wɛ́ɛ tɛ́ mà, í dàwala, ben n mↄwao gunnamana guu. 
Mɛ́ mↄ́ n ua mà sa'opↄ kɛ̀ wè ká tɛ́n à tɛ́ kũ o, mɛ́ lù kɛ̀ má sɛ̀nnɛɛnↄ fĩa bonnɛ, 
yã kɛ̀ bↄ̀ ma lɛ́n ma nawɛ̃akɛgurↄ. 
Mɛ́ saa omma kↄ̃n pↄ́ mɛ̀kpananↄ, mɛ́ sãkaronↄ kpatannɛ, mɛ́ n gbãgbã kↄ̃n zùswareenↄ kↄ̃n blèkofĩinↄo. 
Amↄa kɛ̀ á Luda vĩa vĩinↄ, à mↄ́ à ma a píngi, mɛ́ yã kɛ̀ à kɛ̀mɛɛ oare. 
Ma wii pɛ̀zi, à táakilɛna da ma lɛ́n. 
Tó ma yã zaaa dà ma swɛ̃̀n, lɛ Dii gì ma yã mazi. 
Mↄde à ma yã mà, ben à ma aduakɛna sì. 
Aubarikadeen Luda ũ, èe gí ma aduakɛna maziro, èe gímɛ a gbɛ̃kɛɛoro.